Flash News

E-TJERA

"Mos jini arrogant!", ambasadori i BE: Brezi i ri i magjistratëve duhet të ndryshojë kulturën e drejtësisë

"Mos jini arrogant!", ambasadori i BE: Brezi i ri i magjistratëve

Ambasadori i Bashkimit Europian në Tiranë, Silvio Gonzato, u bëri thirrje magjistratëve të rinj të jenë bartës të një kulture të re në sistemin e drejtësisë, duke theksuar se reforma nuk mund të mbështetet vetëm te ndryshimet ligjore, por edhe te integriteti dhe sjellja profesionale e atyre që e zbatojnë ligjin.

Gjatë fjalës së mbajtur në Konferencën Ndërkombëtare "Ndërveprimi i drejtësisë me median", Gonzato u shpreh se gjyqtarët dhe prokurorët e rinj do të kenë një rol kyç në garantimin e standardeve europiane, pasi çdo vendim i tyre do të ndikojë drejtpërdrejt në jetën, liritë dhe të drejtat e qytetarëve.

Ambasadori nënvizoi se njohuritë profesionale nuk janë të mjaftueshme pa vlera si integriteti, pavarësia, ndershmëria, guximi dhe përulësia.

“Përgjegjësia që keni është tejet e madhe dhe kjo kërkon shumë më tepër sesa njohuri teknike. Kërkon integritet, ndershmëri, pavarësi, guxim, por edhe përulësi, sepse duhet të pranoni se ndonjëherë përshtypja e parë mund të mos jetë e duhura. Duhet të jeni të përulur, jo arrogantë”, u shpreh Gonzato.
Ai vlerësoi se Shqipëria nuk mund të arrijë standardet e Bashkimit Europian vetëm përmes miratimit të ligjeve, por përmes mënyrës se si ato zbatohen në praktikë nga institucionet e drejtësisë.

Sipas Gonzatos, ndryshimi i mentalitetit brenda sistemit mbetet ende një sfidë.

Institucionet nuk ndërtohen vetëm me ligje dhe rregullore. Ato kërkojnë një ndryshim kulture dhe mendësie te njerëzit që punojnë në to.

Nuk jam i bindur se ky ndryshim është arritur ende plotësisht. Në disa raste vazhdon të ketë hezitim për të pranuar natyrën kolegjiale të vendimmarrjes në institucionet e drejtësisë”, tha ambasadori.
Në përfundim, Gonzato theksoi se asnjë institucion i drejtësisë nuk mund të funksionojë i izoluar, duke nënvizuar se bashkëpunimi ndërmjet tyre është thelbësor për garantimin e sundimit të ligjit dhe ofrimin e një shërbimi cilësor për qytetarët.

Të fundit