"Jam lypësi më i gjatë në planet", Rama për sigurimin e vaksinës: Po diskutojmë me tre shtete mike, presim vulën

Foto ilustruese

Kryeministri Edi Rama bëri me dije se qeveria është në diskutime me tre shtete mike për të siguruar vaksinat anti-Covid. Ai tha se bisedimet me një prej shteteve janë thuajse të përfunduara dhe pritet vetëm vula.

Rama njoftoi se “brenda marsit do të vijnë në vend 40 mijë dozat e Pfizerit”, dhe në prill do të vazhdohet me dozat e vaksinave të kompanisë Pfizer dhe Astra Zeneca.

Rama tha me batutë se është lypësi më i gjatë në planet për vaksinat. Ai iu bëri thirrje edhe të rinjve që të respektojnë masat anti-covid, ndërsa shtoi se vaksinimi do të nisë nga moshat më të mëdha, duke zbritur.

“Të rinjtë që po rriskohen të ruhen. Ata duhet të bëjnë çmos që të mos bëhen pjesë e shkeljeve. Ky virus është i rrezikshëm për të gjithë. Ne nuk do të shpikim rrotën dhe do të bëjmë një proces të sajuar me forcat tona.

Strategjitë kanë një emërues të përbashkët; nga mosha më e madhe poshtë. Nga mjekët dhe infermierët, tek mësuesit, policët dhe horizontalisht më tutje. Çështja është sasia. Kemi marrë konfirmim për 360 mijë vaksina AstraZeneca që do të hyjnë në proces dhe më pas do të zbresim shumë shpejt tek 65 vjeçarët edhe më poshtë.

Jemi duke diskutuar afër një sasie tjetër të konsiderueshme. Por kuptoni pozitën time se nuk janë gjëra të finalizuara, pasi thonë; oh e tha dhe se mbajti. Ne do të kemi 41 mijë dozat e Pfizer brenda marsit, siç e kam thënë dhe pastaj vazhdojmë në prill me vaksinat e tjera. Ajo që na duhet është vula mbi marrëveshjen e shtetit mik, ndaj pres me çdo ditë, por duhet vula. Edhe po nuk u bë, mund t’ju tregoj dokumentet që procesi ka ndodhur biseda. Jam lypësi më i gjatë në planet pa diskutim. Një tjetër vend mik është në diskutime e një vend i tretë është në kontakte me ne sot në mëngjes”, tha Rama.

Prej nisjes së procesit të vaksinimit në Shqipëri, janë 6728 persona që kanë marrë dozën e parë. Prioritet në marrjen e vaksinës kanë pasur bluzat e bardha dhe tashmë të moshuarit.

Ndërkohë një ditë më parë në vendin tonë mbërriti një tjetër sasi vaksinash prej 8190 doza nga kontrata me kompaninë Pfizer. Vendi deri më tani ka marrë 17 255 doza të vaksinës Pfizer, dozat e para erdhën dhuratë nga një vend ‘mik’. 

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm