11 Maj/ Këlliçi thirrje SPAK-ut për hetimin e krimeve zgjedhore dhe përdorimit të administratës nga qeveria

Drejtuesi politik i Partisë Demokratike për Tiranën, Belind Këlliçi, ka shpërndarë një mesazh të fuqishëm në rrjetet sociale, duke kërkuar ndërhyrjen e Task Forcës së SPAK për të hetuar krimet zgjedhore që, sipas tij, po ndodhin në administratën shtetërore.

Në një postim të bërë publik, Këlliçi ka denoncuar tentativën e titullares së Agjencisë së Pasurive të Sekuestruara, Risena Xhaja, për të kthyer këtë institucion në një shtab elektoral të disa politikanëve të lidhur me pushtetin.

Ai ka kërkuar që SPAK të veprojë menjëherë për të ndaluar përdorimin e administratës publike për qëllime elektorale dhe ka theksuar rëndësinë e votës së lirë për të realizuar ndryshimin e shumëpritur nga shqiptarët.

Postimi i plotë:

Thirrje publike drejtuar TASK FORCËS së SPAK për krimet zgjedhore!

Një punonjës i ndershëm i Agjencisë së Pasurive të Sekuestruara, informon se titullarja e institucionit Risena Xhaja, në bashkëpunim me Aurel Boriçin, këshilltarin besnik të Erion Veliajt, po tentojnë ta kthejnë këtë institucion në një shtab elektoral të Fatmir dhe Etjen Xhafës!

Fakti i mësipërm është lehtësisht i verifikueshëm, nëse SPAK ka vullnetin apo dëshirën të sekuestrojë pamjet filmike apo telefonat e këtyre shtetasve.

Në 3 ditët e fundit, kemi konstatuar dhe denoncuar përsëritjen e të njëjtës skemë të patronazhimit, blerjes së votës dhe shantazhimit me vendin e punës të Administratës Publike nga partia shtet!

Ndaj SPAK duhet të veprojë menjëherë sot, pasi nesër do të jetë shumë vonë!

Garantojmë punonjësit e ndershëm të Administratës Publike, se për ne ata janë aset kombëtar dhe të tillë do të mbeten edhe pas fitores së PD më 11 Maj.

Prandaj duhet që ditën e dielë, ti drejtohen të lirë dhe të vendosur kutive të votimit, për ta bërë realitet sëbashku ndryshimin e madh që presin të gjithë shqiptarët.

Votoni për veten, për familjet dhe për fëmijët tuaj.