Meta: Bujqësia me kredi, mashtrimi i ri!

Presidenti i Partisë së Lirisë, Ilir Meta, ka komentuar mbrëmjen e kësaj të premte skemën "Bujqësia me kredi", e cila sipas tij është një mashtrim. 

Në një reagim në rrjete sociale, Meta shkruan se miliona euro të dhuruara nga Bashkimi Europian për bujqësinë janë përvetësuar nga qeveria përmes “investitorëve strategjikë”, të cilët kanë ndërtuar pishina, vila dhe resorte, ndërsa fermerët e vërtetë kanë mbetur pa mbështetje financiare.

Sipas Metës, mungesa e transparencës dhe korrupsioni i shfrenuar kanë detyruar Bashkimin Europian të ndërpresë për dy vite radhazi grantet për bujqësinë shqiptare, duke i hequr fermerëve tanë 120 milionë euro ndihmë të pakthyeshme. Ai thekson se ndërkohë Serbia ka përfituar plot 280 milionë euro nga BE për sektorin bujqësor.

Në postimin e tij, Meta kritikon edhe vendosjen e TVSH-së 20% për produktet vendase, duke e cilësuar si një masë që shtyp prodhimin vendas dhe dëmton konkurrueshmërinë e fermerëve shqiptarë në treg.

Postimi i plotë:

Miliona euro para të dhuruara për fermerët tanë nga Bashkimi Europian, përfunduan në xhepat e "investitorëve strategjikë" për pishina vilash dhe resortesh.

Nuk u ndalën në babëzinë e tyre, aq sa edhe 310 mijë euro për Bujqësinë, u zhvatën nga një punonjës i inceneratorit inekzistent të Tiranës, të cilin e shndërruan në fermer për t'i kaluar paratë.

Ndërkohë zero fonde për blegtorinë, zero fonde për serat, frutikulturën dhe agro-përpunimin.

Përballë këtij korrupsioni galopant, BE ndërpreu edhe për dy vitet e ardhshme grantet për Bujqësinë.

Plot 120 milionë euro para të dhuruara ju hoqën fermerëve tanë, sepse BE kërkon të kthehen pas paratë e korrupsionit.

Ndërkohë vazhdon tallja me fermerët, blegtorët dhe agro-përpunuesit, duke u premtuar kredi me fonde sovrane.

Pra meqenëse paratë e falura nga BE për ju të dashur fermerë përfunduan në xhepat e korrupsionit, atëherë Kreu i Organizatës ju fton të aplikoni për kredi sovrane ashtu siç ju gënjeu edhe në vitin 2015, me të njëjtën mënyrë dhe me të njëjtin mashtrim banal.

Jemi i vetmi vend në Europë ku Bujqësia merr zero fonde europiane, ndërkohë që Serbia përfiton plot 280 milion euro.

Jemi i vetmi vend në Europë që shtyp prodhimin vendas me tatim vlerë të shtuar 20 përqind. Nuk ka Bujqësi në BE që financohet me kredi, por vetëm me para të drejtpërdrejta të dhuruara. Prandaj "Bujqësi me Kredi", është thjesht një Mashtrim i Ri.