Rindërimi, Oketa: Një kompanie të një kryetari bashkie të PS i është dhënë një tender me 667 objekte, pjesa e luanit 4-5 kompanive

Anëtari i Këshillit Kombëtar të PD Gazmend Oketa deklaron se kompanisë së një kryetari bashkie të PS i është dhënë një tender me 667 objekte për të rindërtuar.

Duke folur për situatën pas tërmetit dhe në kohë pandemie në Durrës, Oketa tha në ‘Real Story’ se ka abuzime dhe paaftësi në procesin e rindërtimit dhe vlerësimit të dëmeve.

“Nëse do të vini në Durrës duket se tërmeti është harruar, iu referohem institucioneve. Duket sikur jeta i është kthyer normalitetit. Institucionet vijojnë me të njëjtin përkushtim për tenderat. Ra tërmeti, shkaktoi pasoja. Ra pandemia, prapë situatë emergjence ekonomike. Ç’nevojë ka qyteti i Durrësit, të ngushtojë rrugët dhe të bëjë trotuare me mermerë? Ç’nevojë ka qyteti i Durrësit për Velierën?! Kryeministri thoshte “luftë, luftë, luftë”. Në situatë lufte, s’di ndonjë vend që të harxhojë paratë për trotuarë me mermerë. Në këndvështrimin tim qeveria duhet të bënte një rialokim fondesh.

Krejt situatë tjetër atje ku kam zyrën. S’po spekuloj, pasi kam dokumente. Disa kanë marrë dhe disa jo. Ka abuzime dhe paaftësi.

Iu dha qytetarëve nga 1-2 milionë sa për suvatim dhe për të lyer shtëpitë. Pjesa tjetër, pjesa e luanit i është dhënë 4-5 kompanive. Një kompanie të një kryetari bashkie socialist i është dhënë një tender me 667 objekte, e dini këtë. Ndërkohë në gjykimin tim inxhinierik, jo politik ato firmat që po shtrojnë ato pllakat e mermerit që nuk i hyjnë në punë askujt në këtë kohë, për mua nuk i hyjnë në punë asnjëherë fare mirë mund të punonin për rindërtimin e qytetit.

Këto firma që marrin tendera i kanë të gjitha me nënkontraktim dhe i marrin i fusin paratë në xhep. Ne të pestë do mbarojmë emisionin, do ikim të flemë në shtëpitë tona. Po flasim për ata qytetarë, për menaxhimin. Ne po flasim si duhet menaxhuar jo se është ilegale”, tha Oketa.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm