"Qeveria rriti me 749% mbështetjen për bletarinë", PD i kthehet Ramës: Lugën bosh e shoqëron me mjalt propagandistik

Kryeministri Edi Rama ka publikuar një video në rrjetet sociale, përmes së cilës tregon mbështetjen e dhënë nga qeveria me fondet publike në 7 vitet e fundit për bletarinë.

Përmes një postimi në rrjetet sociale, Rama shkruan se nga 19.2 milionë lekë në 2013, qeveria ka rritur fondet me 749% më shumë deri në 2020, pra 163 milionë lekë.

Pas kësaj deklarate të kryeministrit, i menjëhershëm ka qenë reagimi i Partisë Demokratike. Eksperti i ekonomisë pranë selisë blu, Dorjan Teliti, i ka cilësuar statistikat e kryeministrit si “mjalt propagandistik”.

“Edhe pse ka 4 vite rresht që bletërritësit ulin numrin e koshereve, në kulmin e pandemisë ER nuk u ka ofruar atyre dhe fermerëve as 10% të masës së subvencioneve që kanë ofruar vendet e rajonit”, thekson Teliti, teksa shton se “është fakt që të gjjthë bletërritësit dhe fermerët shqiptarë u përjashtuan nga skemat gjysmake të ndihmës që dha qeveria shqiptare gjatë pandemisë.”

Reagimi i plotë i Telitit:

I rrethuar nga statistika negative në të gjithë sektorët e ekonomisë, ER po përpiqet që lugën bosh të propagandës ta mbushë me gënjeshtra shoqëruar me mjalt propagandistik.

Edhe pse ka 4 vite rresht që bletërritësit ulin numrin e koshereve, në kulmin e pandemisë ER nuk u ka ofruar atyre dhe fermerëve as 10% të masës së subvencioneve që kanë ofruar vendet e rajonit.

Për fat të keq, videot 3D të ëmbëlsuara me propagandë, nuk ua lehtësojnë gjendjen bletërritësve.

Fakt mbetet që të gjjthë bletërritësit dhe fermerët shqiptarë u përjashtuan nga skemat gjysmake të ndihmës që dha qeveria shqiptare gjatë pandemisë.

Bletërritësit shqiptarë nuk i ndihmon mburrja e ER me punën e tyre.

Bletërritësit dhe të gjithë fermerët kanë nevojë për ndihmë konkrete dhe jo tabela me ngjyra që fshehin të vërtetën e dhimbshme te fermerëve shqiptarë.

Lekët për të ndihmuar fermerët janë, por qeveria dhe në ditët më të vështira të pandemisë nuk ndihmon qytetarët por paguan për inceneratorë që nuk punojnë.