Përçarje në të majtën e Matit? Kryetarja e grave socialiste shpall kandidaturë të pavarur

Kryetarja e grave socialiste të Matit, Suzana Pasha Hoti, ka shpallur kandidaturën e saj të pavarur për zgjedhjet e pjesshme lokale që pritet të mbahen më 9 nëntor.

Përmes një postimi në rrjete sociale, Hoti shkruan se vendimi i saj vjen si një reagim ndaj mungesës së përfaqësimit real dhe nevojës për një qeverisje të hapur dhe të ndershme në nivel vendor.

Po kush është Suzana Pasha Hoti?

Suzana Pasha Hoti, me profesion avokate, ka drejtuar për 17 vite organizatën e grave socialiste të Matit. Ajo ka qënë dy herë kryetare e KZAZ në zgjedhjet e 2023 për bashki dhe në zgjedhjet lokale të 11 Majit.

Hoti njihet gjithashtu si mbështetësja më e madhe e Agron Malajt (ish-kryebashkiaku socialist i Matit) i cili dha dorëheqjen më 11 Mars të këtij viti për të kandiduar si deputet në Qarkun e Dibrës. 

Gjithashtu mësohet se edhe bashkëshorti i Suzana Pasha Hotit ka mbajtur funksione të larta në administratë si drejtor.

Mbetet për tu parë se kush do ta marrë drejtimin e Bashkisë së Matit, pasi PS ka zyrtarizuar kandidatin Altin Bojni për këtë garë i cili ka mbajtur postin e drejtorit të Shëndetit Publik dhe anëtar i Këshillit Bashkiak. Siduket emri i Bojnit nuk është pranuar nga Hoti e cila ka sfiduar me kandidaturë të pavarur.

Ndërkohë nga radhët e PD-së është zgjedhur Eduart Brahilika si kandidat për Bashkinë Mat.

Reagimi i plotë i Hotit

Unë jam Suzana Pasha Hoti

Një bijë e Matit me rrënjë me zemër dhe me përgjegjësi qytetare.

Kam lindur, jetuar dhe kontribuar në këtë vend, dhe gjatë gjithë jetës time nuk jam shkëputur kurrë prej Matit dhe Matjanëve tanë të dashur.

Sepse kur je e lidhur me shpirt dhe me zemër me tokën ku je lindur, me Matin dhe Matjanët që ka bërë histori , nuk e braktis dot, por i qëndron pranë në ditë të mira dhe të vështira.

Prej më shumë se 25 vitesh jam në shërbim publik me dashuri dhe profesionalizëm në shërbim të komunitetit Matjanë

Kam qenë pranë njerëzve në punë konkrete, në përfaqësim dhe në përpjekje për të zgjidhur hallet e tyre.

Për 17 vite kam drejtuar organizatën e grave socialiste të Matit – një rol që më ka dhënë mundësinë të dëgjoj, të kuptoj, të reagoj ndaj nevojave të vërteta të komunitetit.

E di mirë sa e vështirë është të punosh fort dhe të mos dëgjohesh.

Prandaj sot nuk kërkoj vetëm një votë.
Kërkoj besim.
Besimin se një zë i drejtë, i vendosur dhe me përvojë mund të përfaqësojë denjësisht qytetarët e Matit

Kërkoj gjithësecilin nga JU të bëhet pjesë reale e një përfaqësimi për një shërbim real dhe të prekshëm ndaj Matjanëve.

Bashkia nuk mund të jetë pronë e një individi, ajo nga vete emri i perket bashkësisë së komunitetit, Matjanëve.

Unë besoj në shtetin social, në forcimin e institucioneve dhe në zhvillimin ekonomik progresiv për tërë shtesat e komunitetit.

Kam mbështetur reformat e ndërmarra nga Kryeministri Edi Rama dhe qeveria socialiste, sepse ato kanë pasur në qendër gruan, qytetarin, zhvillimin, njeriun punëtor dhe profesionistin e ndershëm.

Por besimi nuk është i pakushtëzuar.

Mbështetja nga qeveria duhet të reflektohet edhe në qeverisjen lokale.

Në Mat, kjo mbështetje nuk ndihet siç duhet, dhe kur e them une, tregon që duhet punuar më shumë dhe përfshirë gjithesecili nga ne që zhvillimi i qendrueshëm të jetë prezent te çdo Matjanë.

Në Mat;

Pushteti është përqendruar.

Vendimmarrja është e mbyllur.

Fjala e strukturave, e grave dhe e kontribuuesve nuk dëgjohet.

Në zgjedhjet e fundit, qindra qytetarë zgjodhën të votonin për Partinë Socialiste – por jo për mënyrën si po qeveriset sot në Mat.

Ata nuk refuzuan PS-në dhe Shqipërine Europiane 2030.

Dhe unë qëndroj krah tyre, sepse besoj se një parti e fortë është ajo që dëgjon zërin e anëtarëve të saj, dhe e përmirëson veten nga brenda.

Dokumentacioni im është gati.

Edhe pse proceset institucionale nuk janë mbyllur ende, qëndrimi im është i qartë:

Unë nuk tërhiqem.

Sepse zëri i qytetarëve të lirë nuk mund të tërhiqet, nuk mund të heshtet.

Bashkia Mat nuk është pronë.

Ajo është një institucion që duhet t’u shërbejë të gjithëve:

– Nënave që mbajnë familjet me përkushtim,
– Të rinjve që duan të ndërtojnë një të ardhme këtu,
– Punonjësve që duan të respektohen për punën e tyre,
– Çdo qytetari që kërkon dinjitet, transparencë dhe zhvillim të ndershëm.

Koha e frikës ka mbaruar.
Tani është koha e fjalës së lirë.
Koha e qytetarëve të lirë.

Nëse edhe ti beson se Matit i duhet një zë i ri – me përvojë, integritet dhe përkushtim Qëndro pranë meje
Bashkohu për një Mat te zhvilluar dhe jo te braktisur.

Mati për të gjithë.
Koha për një qeverisje të hapur, të ndershme dhe përfaqësuese ka ardhur.

Suzana Pasha Hoti për Bashkinë Mat