Flash News

Berisha: Në PPE kërkova mbështetje ndërkombëtare për protestat qytetare, PD i mbështet plotësisht

“Mandi tha se do të nxirrte një frigorifer”, zhdukja e Eglant Koçit, zbardhet dëshmia e përkrahësit të autorit

"Mbro tokën", mes protestave, BE i kujton Ramës kushtin për integrim

Kush janë 4 anëtarët e grupit kriminal të arrestuar në Tiranë

Prindër, bëni kujdes me kondicionerin! Mjeku tregon shenjat e para të edemës së laringut

KRYESORE

Festa e Abaz Aliut, presidenti Meta ngjitet në malin e Tomorrit: Këtë pjesëmarrje nuk e imagjinonim 25 vite më parë

Politiko 22 Gusht 2017, 13:57
Festa e Abaz Aliut, presidenti Meta ngjitet në malin e Tomorrit:

Mijëra besimtarë bektashinj kremtuan sot festën e Abaz Aliut në malin e Tomorrit. Në ceremoninë e organizuar me këtë rast ishin të pranishëm Presidenti i Republikës Ilir Meta, Kryegjyshi Botëror i Bektashinjve Haxhi Dede Edmond Brahimaj, drejtues vendorë, përfaqësues të huaj, besimtarë bektashinj etj.

Presidenti Meta në fjalën e tij u shpreh se “sot, duke parë këtë pjesëmarrje të jashtëzakonshme nuk do e kisha imagjinuar që 25 vite më parë, kur morëm nisëm me baba Reshatin,  ky do të kthehej në një pelegrinazh madhështor, ku marrin pjesë nga të gjitha trevat e Shqipërisë si dhe turistë e vizitorë të huaj”. Gjithashtu ai shprehu mirënjohjen për përpjekjen titanike të nismëtarit Baba Reshatit, që kjo festë përcjell tolerancën fetare dhe atdhedashurinë si një virtyt të bektashinjve.

”Figura e Abaz Aliut  dhe mali i Tomorrit  përfaqësojnë një fuqi mbinatyrore e kjo fuqi tërheq si magnet akoma dhe me shumë njerëz që kërkojnë forcë për të ardhmen e tyre”, shtoi në fjalën e tij Ilir Meta.

Sipas Presidentit Meta, bektashizmi ka vlera të jashtëzakonshme  për kontributin që ka dhënë historikisht për të vaditur me dashuri dhe përkushtim rrënjët e atdhedashurisë. “Bektashizmi dhe atdhedashuria janë një dhe të pandara. Ne jemi sot këtu për të kujtuar sakrificat dhe modelin, frymëzimin e Abaz Aliut, luftëtar i dinjitetit dhe lirive, që edhe sot vazhdon të frymëzojë”, shtoi Meta.

Në fund të fjalimit ai falënderoi dhe Kryegjyshin Botëror të Bektashinjve Haxhi Dede Edmond Brahimaj për vazhdimësinë e kësaj feste dhe të këtij pelegrinazhi, ku nga ky i fundit ju dhurua në shenjë falënderimi një medalion me imazhin e baba Reshatit.

Kryegjyshi Botëror i Bektashinjve Haxhi Dede Edmond Brahimaj uroi besimtarët për paqe, shëndet e lumturi. “Në këtë ditë të shenjtë të Abaz Aliut unë uroj shqiptarët dhe besimtarët bektashinj në të gjithë botën që Zoti t’ ju japë dashuri, paqe dhe mirësi për veten dhe njerëzit”, tha baba Mondi.

Duke folur për figurën e Abaz Aliut, baba Mondi u shpreh se “në lartësinë e këtij mali, ne kemi shenjtorin tonë, Abaz Aliun, pavarësisht legjendave ai është realitet i burrërisë përballë frikës, i jetës përballë vdekjes, i burrit dhe i trimit që u identifikua deri në fund me emrin e ndërgjegjes”.

Mijëra besimtarë bektashinj nga data 20-25 gusht kryejnë pelegrinazhin e tyre të përvitshëm në malin e Tomorrit, duke vizituar tyrben e Kulmakut dhe duke bërë rituale të shenjta në nderim të Abaz Aliut.

Besimtarët ngrenë tenda të shumta në pllajat e malit mbi 2 400 metra mbi nivelin e detit dhe rreth 200 km rrugë në juglindje të kryeqytetit. Për pesë ditë rresht, besimtarët vizitojnë vendet e shenjta, ndjekin ritualet e festës së Abaz Aliut dhe dëgjojnë fjalimet e klerikëve të tyre mbi historinë e shenjtërimit të baba Tomorrit dhe veprat e shenjtorëve bektashinj në të mirë të njerëzve.

Ritet shumëshekullore të besimit bektashi për festën e Abaz Aliut përfshijnë ndezjen e qirinjve në vendet e shenjta, dhurimin e të hollave pranë objekteve të kultit, flijimin e një deleje apo qingji dhe ndarjen e ushqimit midis besimtarëve.

Ashtu si ndodh edhe me festat e besimeve të tjera, edhe në pelegrinazhin e përvitshëm të baba Tomorrit, harmonia fetare vlen për t’u shënuar. Besimtarë të feve të tjera i urojnë bektashinjve festën e Abaz Aliut dhe madje jo pak prej tyre marrin pjesë në pelegrinazh bashkë me ta.

Bashkëjetesa fetare është një tipar shumëshekullor i shoqërisë shqiptare. Përveç ndalimit të fesë nga regjimi komunist, vrasjes dhe burgosjes së klerikëve dhe shkatërrimit të qindra kishave, xhamive e teqeve, Shqipëria nuk ka shënuar në historinë e saj asnjë konflikt ndërfetar mes njerëzve dhe qeveritë janë kujdesur për liritë fetare dhe për të mbrojtur këto vlera tradicionale të popullit shqiptar.

Të fundit