Propozimi i PS për ndryshimin e Kodit Penal, Avokati i Popullit për Politiko: Nuk kemi marrë ende asnjë projektligj zyrtar

Suela Gjidede

Avokati i Popullit ka reaguar për herë të parë në Politiko.al nismën e socialistëve për të ndaluar gjykatën të pezullojë një anëtar të qeverisë, apo disa funksione të tjera kushtetuese, përfshirë dhe vetë Avokatin e Popullit. Në një përgjigje zyrtare, Avokati i Popullit bën me dije se aktualisht nuk ka marrë asnjë dokument zyrtar nga qeveria për këtë çështje.

“Në përgjigje të kërkesës suaj për informacion, ju bëjmë me dije se pranë institucionit të Avokatit të Popullit nuk është administruar ende asnjë propozim zyrtar apo projektligj nga qeveria lidhur me çështjen e imunitetit të Avokatit të Popullit”, thuhet në reagimin për Politiko.al.

Më tej, institucioni thekson se garancitë për ushtrimin e mandatit të tij janë të parashikuara në Kushtetuta e Republikës së Shqipërisë, duke e konsideruar imunitetin si një element thelbësor për mbrojtjen e pavarësisë institucionale.

“Siç jeni në dijeni, garancitë e ushtrimit të mandatit të Avokatit të Popullit, përfshirë imunitetin, janë të sanksionuara qartë në Kushtetutën e Republikës së Shqipërisë si një element thelbësor për mbrojtjen e pavarësisë së institucionit”, vijon përgjigjja.

Institucioni sqaron gjithashtu se çdo qëndrim zyrtar kërkon analizë të plotë të dokumentacionit përfundimtar dhe relacioneve shpjeguese përkatëse.

Sa i përket diskutimeve publike, Avokati i Popullit thekson se fazat e hershme të debatit mediatik nuk përbëjnë bazë të mjaftueshme për një vlerësim objektiv.

“Për shkak të kësaj rëndësie dhe natyrës së punës sonë, çdo qëndrim institucional kërkon një analizë rigoroze të dokumentacionit përfundimtar dhe relacioneve shpjeguese bashkëngjitur. Diskutimet mediatike në fazat e hershme, ndonëse të rëndësishme, përfaqësojnë një moment ku idetë mund të pësojnë ndryshime dhe nuk ofrojnë bazën e nevojshme për një vlerësim objektiv”, thuhet më tej.

Në përfundim, institucioni shprehet se sapo të njihet zyrtarisht me tekstin e plotë dhe përfundimtar të nismës, do ta shqyrtojë atë me vëmendjen e duhur dhe do të bëjë publik qëndrimin e tij.

Ndryshimi i propozuar ne nenin 242 te Kodit te procedurës penale, që veç deputetëve dhe kryetarëve të bashkive, do të bëjë të pamundur pezullimin nga gjykata edhe për Presidentin e Republikës, kryeministrin, zv.kryeministrin, ministrat, kreun e KLSH, Avokatin e Popullit dhe anëtarët e Gjykatës kushtetuese.

Ligji i ri që socialistët do të ndryshojnë i heq gjykatës të drejtën për pezullimin, pa prekur masat e tjera, që vazhdojnë të jenë të zbatueshme.

Për pezullimin e pasaportës dhe masën detyrim paraqitje e një kryeministri apo ministri nuk ka nevojë as sot as pas ndryshimi për asnjë autorizim. Ndërsa për masat arrest në burg apo arrest në shtëpi, SPAK do i duhet edhe sot autorizimi i Kuvendit. /Politiko.al/