Flash News

Evazioni fiskal i ‘Bankers’, lihet në burg CEO kinez dhe ish-drejtori

Përplasen dy makina në aksin Sarandë-Delvinë, 4 të plagosur

Alarm për bombë, Policia largon deputetët dhe mediat nga ndërtesa e Kuvendit të Kosovës

“Vullneti i popullit” dhe ironia e dorëheqjeve të komanduar

Përfundon pa ndryshime rinumërimi i votave në Durrës

OP-ED

A na bën optimistë një qeveri (e mundshme) e Bashës

Politiko 4 Mars 2021, 21:04

A na bën optimistë një qeveri (e mundshme) e Bashës

“Kartolina e urimit” që Basha dhe Kryemadhi kishin zgjedhur për t’u dërguar shikuesve ditën kur hodhën firmat mbi koalicionin PD-LSI, nuk se na gëzon. Në njërën anë ishte një ish-ministër Shëndetësie, reforma më e madhe e të cilit ishte shkurtimi i çarçafëve të spitaleve nga 2 në 1.6 metër. Pacientët shqiptarë do të kenë të paktën këmbët jashtë në rast se i njëjti petropolitik do të kryesonte Shëndetësinë.

Në anën tjetër, atë të kryeministrit në hije, nuk mund të lexoje më shumë se eksitimin e përgjithshëm të photo opp-it (fotos së rastit). Dekori ishte më hijerëndë se ngjarja dhe personazhet më të gatshëm dhe ngazëllimtarë se partizanët e 44-ës për të hyrë në Tiranën e fundluftës.

Por, ka edhe shenja të mira.

Një qeveri Basha-Kryemadhi do të jetë një qeveri kontrollesh dhe balancash. Palët do të kushtëzojnë njëra-tjetrën, dhe të dyja do të kontrollohen nga një gjyqësor i ri, të cilit kanë filluar t’i dalin dhëmbët e pjekurisë.

Nëse PD dhe LSi i bëjnë numrat e fitores më 25 prill, ai i Bashës dhe Kryemadhit do të jetë kabineti më plural dhe më i ndikueshëm i të gjitha kohrave të tranzicionit. Hiq “vitet e brishta” të Nanos, kur kabinetet e PS binin e ngriheshin si qeveri italiane.

Mbi lojën qeveritare, ku do të spikasin Basha me gjatësine dhe brilantinën, dhe Kryemadhi me gjuhën dhe veprimet e adoleshencës, do të zgjaten duart e stërvitura në qeverisje të Sali Berishës dhe të paduruar për aksion dhe akses të vijës së parë të Ilir Metës. Tingëllima e aleatëve të vegjël do të jetë gjithaq koncertore.

Duke qenë e përqendruar në disa duar, do të jetë edhe lehtësisht e cënueshme. Kjo balancë e brishtë mund ta bëjë më të kujdesshme, më gatshme për lëshime dhe më pak autoritare.

Një gjë tjetër, që nuk ka të bëjë me ta, por do t’i ndihmojë, do të jetë edhe dalja eventuale nga pandemia dhe rikthimi i shoqërisë te shpengimi i jetës. Do të shtohen shpenzimet dhe liria dhe qeveria e re do të marrë një dorë nga kjo kthesë e fatit.

Në fund, sa herë ka rotacion apo qeveri të re, shoqëria automatiksht përshkohet nga enzima optimizmi. Siç është i tillë edhe ky editorial, që gërmon thellë në sëndukun e bonsensit.

Të fundit