Antiheronjtë krijojnë heroin

Alfred Lela

Kur të gjithë ishin mpirë nga hapja e fushatës dhe listat e partive, një kandidat për hero u shfaq në vëmendjen publike.

Arjan Sala, 33 vjeç, deri dje i panjohur. I riu u fut mes flakëve për të shpëtuar jetë njerëzore, në një magazinë që po digjej në periferi të Tiranës. Trupi i tij nuk u gjet për disa ditë, duke e mbajtur pezull shpresën e një mrekullie, por edhe duke i shtuar fije këmishës së heroit që po qepej për të.

Jeta e Arjanit u bë me interes publik vetëm në kushte ekstremiteti. Ka çdo ditë arianë në çdo cep të Shqipërisë, që luajnë ‘heroin e heshtur’ në dramën sociale të vetes dhe familjeve.

E dimë se media merret me të pazakontën. Së pari, sepse është kureshtja njerëzore që e kërkon. Së dyti, sepse sot çdo gjë lidhet me klikimet dhe shikimet në facebook, instagram dhe you tube. Ato janë bërë metrika e jetës.

Çfarë ndodhi që media dhe rrjetet sociale ofruan supet për të mbajtur arkëmortin e Arjan Salës, duke e çuar deri te portat e prarura të heroikes?

Është njëfarë mea culpa që media dhe shoqëria bën? Apo është nevoja për të dalë nga zbrazëtia e jetëve virtuale, ku nuk shpëtohen njerëz, por merren nëpër gojë ata?

Shoqëria reagon me brohorima ndaj të tjerë heroizmave në jetën e përditshme, në rrjete sociale dhe në televizion: banalitetit, zhveshjes, tallavasë, çjerrjeve dhe bërtitjeve.

‘Heroi i ditës’ për shembull për katër milion sy, bëhet sa hap e mbyll sytë, personazhi i një reality show televiziv me njohje e puthje. I cili nuk thotë gjë, nuk bën gjë, nuk krijon gjë, por vetëm sa ekziston në lenten e një kamere televizive.

Është e padrejtë ta krahasosh Arjan Salën me një personazh televiziv, por ndoshta kjo pranëvënie na ndihmon për të kuptuar se cili është heroi dhe cili sharlatani.

Në këtë kuptim, shoqëria nuk e njeh dhe as e pranon heroizmin e Arjanit, por kthen kokën drejt tij, sepse media ia ka bërë të pamundur përqendrimin diku tjetër.

Sapo tri ditët e habisë me aktin e Arjanit të zhduken, rrjetet sociale i kthehen babëzisë dhe heroizmit të sharlatanëve të çdo ekrani.

Dhe kështu jeta vazhdon në të përditshmen. E ndërprerë nga Arjan Sala sa për t’ju kujtuar se sharlatanët mund të jeni ju vetë.