Përshesh me gjel deti sipas Arbana Osmanit

Gjeli i detit është kthyer tashmë në gatimin tradicional të tryezave shqiptare në natën e ndërrimit të viteve. Të shumtë janë ata që e gatuajnë në mënyra të ndryshme, e disa të tjerë e pjekin thjeshtë dhe e servirin të plotë.

Një nga recetat që pëlqehet më shumë është gjeli i detit me përshesh e ndërsa të tjerë nuk e pëlqejnë me përshesh por përdorin diçka tjetër. Megjithatë, ne do të sjellim mënyrën se si e gatuan Arbana Osmani gjelin e detit me përshesh, recetë të cilën ajo e ka publikuar në librin e saj të gatimit "Receta për njerëzit që dua".

Arbana shkruan se ky gatim kërkon kohë ndaj dhe përgatitjen e tij e bën në dy faza. Kulaçi përgatitet dhe thërrmohet një ditë para (por kjo nuk është taksative, ju mund ta përgatisni dhe sot).

Për përgatitjen e kulaçit:

• 1200 g miell
• 300 ml kos
• Një majë luge sodë buke
• Një gjysmë luge kripë

Zëmë brumin duke përzier të gjithë përbërësit duke u ndihmuar nga 2 gota ujë që i shtojmë pak e nga pak gjatë përzierjes.

E lëmë për 30 minuta duke e mbuluar me një pecetë të njomur.

E shtrojmë në një tavë që e kemi lyer me pak vaj, e presim pak në sipërfaqe me majë të thikës si të jetë bakllava, por pa e futur thikën në thellësi.

E pjekim në furrën e nxehur 190 gadë, për rreth një orë.

E nxjerrim nga furra dhe e thërrmojmë sa pa u ftohur, pasi, nëse ftohet, procedura e thërrmimit bëhet shumë e vështirë. E vendosim në një tepsi të madhe gjatë natës.

Pë lëngun:

• 2 l lëng pule
• 1 qepë e kuqe e vogël
• Të brendshmet e pulës (të ziera)
• 2 lugë nenexhik i thatë
• Rigon
• Kripë
• 3-4 lugë vaj ulliri

Skuqim në një tenxhere me vaj ulliri qepën e grirë imët, derisa ajo zverdhet.

Shtojmë të brendshmet e pulës që i kemi prerë në copa të vogla dhe i skuqim aty. Hedhim lëngun e pulës. Rregullojmë kripën dhe shtojmë erëzat.

E lëmë në zjarr deri sa të marrë valë në mënyrë që të gjithë përbërësit të lidhen mirë me njëri-tjetrin e lëngu të marrë shije.

Sapo lëngu të ketë valuar, ia hedhim kulaçit që kemi në tenxhere dhe e përziejmë fort me lugë druri, në mënyrë që çdo copë të njomet me lëngun. E shërbejmë të nxehtë me mish nga gjeli i detit.

Në recetën e Arbanës shpjegohet vetëm procesi i gatimit të përsheshit dhe të lëngut, ndërkohë pjekjen e gjelit, Politiko.al ua sjell në mënyrën e gatimit sipas chef Dionis Tucit, i cili ka punuar tek "Mullixhiu:

Përgatitja e gjelit:

Hapi 1

Pasi të keni përgatitur gjelin dhe hequr puplat e çdo papastërti, duhet të filloni me procesin e marinimit dhe çdo hap tjetër që do shpjegohet më poshtë. Bëni gati gjelin, të pastruar.

Hapi 2

Marinoni gjelin e detit me kripë dhe piper për vetëm pak minuta dhe hidhini pak ujë sa të mbulojë tepsinë. Futeni në furrë dhe lëreni për 2 orë në temperaturë 170 gradë. Gjelit duhet t`i hidhni dhe gjalpë sipër që të marrë ngjyrë të kuqërremtë.

Ju bëftë mirë dhe Gëzuar!

*Shënim: Receta e përsheshit dhe e lëngut është marrë nga libri i Arbana Osmanit "Receta për njerëzit që dua". Pjekja e gjelit është nga chef Dionis Tuci, i cili ka punuar tek "Mullixhiu".

*Fotot gjelit të detit janë ilustruese nga Interneti