PD kërkon shkarkimin e Olta Xhaçkës, çfarë përcakton ligji për mandatin e deputetit?

Partia Demokratike deklaroi dje se po mbledhin firmat e nevojshme për të shkarkuar nga detyra ministren e Jashtme Olta Xhacka. Ky hap nga ana e demokratëve vjen pasi bashkëshorti i Xhaçkës fitoi statusin e investitorit strategjik për ndërtimin e një resorti në Dhërmi.

Deputeti demokrat Agron Shehaj prezantoi dje nga selia blu një skemë që sipas ti vërteton se ministrja e Jashtme ndodhet në konflikt interesi, pasi ka shfrytëzuar mandatin e saj për të përfituar tokë në bregdet me qëllim ndërtimin e një biznesi.

“Anëtarja e qeverisë që përfiton një pronë publike nga vetë qeveria, është një rast unik dhe duhet trajtuar më vete. Kolegët e mi kanë zgjedhur një rrugë tjetër. Por komisioni hetimor në thelb mblidhet për të grumbulluar fakte dhe prova. Ne nuk kemi nevojë për prova të tjera, sepse i kemi të gjitha. Ne jemi gati të mbledhim firmat dhe të kërkojmë heqjen e mandatit, kurse ata duan një komision hetimor. S’ka nevojë për të bërë politik me këtë apo për të zbehur aferën. Të gjitha faktet janë publike”, tha Shehaj.

Por çfarë parashikon ligji?

Neni 70, pika 2 parashikon që “deputetët nuk mund të ushtrojnë njëkohësisht asnjë detyrë tjetër shtetërore, përveç asaj të anëtarit të Këshillit të Ministrave. Rastet e tjera të papajtueshmërisë caktohen me ligj.”

Pika 3 e këtij neni përcakton se “deputetët nuk mund të kryejnë asnjë veprimtari tjetër fitimprurëse që buron nga pasuria e shtetit ose e pushtetit vendor dhe as të fitojnë pasuri të këtyre”. Në rast shkelet pika 3 e këtij neni,me mocion të kryetarit të Kuvendit ose të një të dhjetës së anëtarëve të tij, Kuvendi vendos të dërgojë ose jo çështjen në Gjykatën Kushtetuese, për të konstatuar nëse ka papajtueshmëri.

Neni 71 pika 2 përcakton se “mandati i deputetit mbaron ose është i pavlefshëm kur vërtetohet një nga kushtet e pazgjedhshmërisë ose papajtueshmërisë të parashikuara në nenet 69, 70 paragrafët 2”.

Olta Xhaçka bashkëpronare në kompaninë e bashkëshortit

Kompania “AG. TÇ” SH.P.K, në pronësi të bashkëshortit të ministres Xhaçka, u shpall investitor strategjik për ndërtimin e resortit në Dhërmi, i cili parashikon marrjen e tokës në bregdet në përdorim për 30 vite, më 29 mars të vitit 2021.

Ligji përcakton që për çdo pasuri që vendoset pas martesës, bashkëshorti dhe bashkëshortja janë bashkëpronarë të pasurisë me vlerë të përbashkët. Në këto kushte kompania e bashkëshortit të ministres që mori statusin e investitorit strategjik, ka bashkëpronare edhe ministren Xhaçka, çka bën që kjo e fundit të jetë në konflikt interesi.

Për të shmangur formalisht përplasjet e interesave, u krijua kompania “AGTÇ HOTEL MANAGEMENT”,  e kunatës së Xhaçkës, shtetases amerikane znj. Sutton. Rama ndryshon vendimin e datës 22.02.2021 dhe shton kompaninë e kunatës si investitore strategjike. Më 2 mars të këtij viti, kunata e ministres merr pronën publike në përdorim.