Tërheqja e Ramës nga rritja e energjisë elektrike, Shano në Politiko: Pse shteti shqiptar ka marrë çehre sulltanati

Kryeministri Edi Rama këtë të premte ka njoftuar se qeveria ka marrë vendimin për të shtyrë hyrjen në fuqi të fashës 800kWh për energjinë elektrike.

Përmes një videoje në rrjete sociale Rama sqaroi se ditët e fundit ka pasur përmirësim të nivelit në Fierzë për shkak të reshjeve të shiut, por edhe fillimi i qasjes pozitive të abonentëve familjarë për të kursyer energjinë, ndikuan në këtë vendim të qeverisë.

Ndryshe nga kryeministri, ekspertët kanë tjetër mendim lidhur me këtë tërheqje të qeverisë ‘Rama’.

Eksperti i ekonomisë, Dritan Shano në një reagim për Politiko.al thotë se e gjithë kjo situatë të jep përshtypjen se jemi kthyer në një shtet me çehren e një sulltanati.

“Shteti shqiptar ka marrë një çehre shumë të keqe. Një çehre sulltanati, prej së cilës Ismail Qemali shpalli mëvetësinë në Vlorë në 28 Nëntor 1912”, thotë Shano.

Vetëm një javë më parë Enti Rregullator i Energjisë ndryshoi tarifën e energjisë për konsumatorët familjarë, duke e 4-fishuar atë për çdo kilovat të konsumuar mbi 800 kW, gjatë periudhës Tetor - Dhjetor 2022, ndërsa eksperti bën një bilanc të të ardhurave që do të garantonte shteti nëse vihej në zbatim ky vendim.  

“Nga kjo masë, kjo taksë e re, pritej që brenda këtyre 3 muajve të zhvendoseshin nga xhepat e shqiptarëve në ato të kompanisë publike OSSHE rreth 100 milionë Euro. Enti Rregullator i Energjisë e miratoi këtë masë përmes të cilës u merren 100 milionë Euro shqiptarëve se OSSHE ja mbushi mendjen që do ketë krizë në furnizimin me energji dhe se Shqipëria do detyrohej të importonte me çmime të tregut ndërkombëtar. Pra mbi pritshmërinë e OSSHE, edhe pse bëhet fjalë për një periudhë 3 mujore mjaft të lagur në Shqipëri, e cila prodhon 99.8% të energjise nga burime hidrike, pra të lagura

Qeveria ka një periudhë të mirë të ardhurash gjatë 2022-shit. Ka para nëpër duar. Paratë tona janë se qeveria nuk ka asnjëherë para të vetat. Në buxhet ka rreth 300 milionë Euro të ardhura shtesë deri më tani, kryesisht për shkak të inflacionit, rritjes së çmimeve, pra një takse të mirëfilltë siç është inflacioni që nuk është ndonjë dukuri natyrore, por politikë qeveritare.

Këto para, të paparashikuara në buxhetin e vitit 2022 mund të përdoren për të amortizuar çdo rritje të ardhshme të çmimit në rast se do lindë nevoja për të blerë në tregun ndërkombëtar. Fondi rezervë dhe Kontigjenca gjithashtu mund të përdoren për këtë qëllim. I gjithë buxheti mund të rishikohet në mënyrë që të mos preket mirëqenia e shqiptarëve. Qëllim fisnik apo jo?”, shprehet Shano në Politiko.al.  

Duke u ndalur te vendimi i fundit i Ramës, i cili deklaroi se qeveria tërhiqet nga vendimi i rritjes së çmimit të energjisë elektrike, eksperti ngre dy pikëpyetje që mund ta kenë shtyrë kryeministrin drejt këtij vendimi.

Shano nuk kursen as ironinë, teksa thotë se nuk i rezulton që Kryeministri të jetë zëdhënës i ERE, dhe as i OSSHE, pasi këto dy institucione shfaqen dukshëm nën urdhrat e qeverisë.  

“Sot, Kryeministri Rama tha që nuk do e rrisë çmimin e energjisë për konsumin mbi 800 kW, se kështu u diskutua dje në darkë.

Nuk e di pse e ka bërë , për shkak se ka ndjerë presion nga publiku apo se ka marrë stilolapsin në dorë për të bërë disa llogari?!

Sikur asnjë institucion tjetër nuk ekziston në Republikën e Shqipërisë. Gjithnjë nëse ende jemi Republikë.

Sepse ERE nuk varet nga Qeveria, jo të jetë ndonjë drejtori e Kryeministrisë. Se në një shtet modern institucionet janë të pavaruara, pikërisht që ndonjëri mos të bëjë çfarë i do qejfi, sikur Shqipëria të ishte ndonjë sulltanat. Nuk më rezulton që ERE të jetë mbledhur të anullojë vendimin e saj.

Nuk më rezulton që OSSHE të ketë kërkuar tek ERE të anullojë apo pezullojë vendimin e marrë 1 javë më parë. Po ashtu nuk më rezulton që Kryeministri të jetë zëdhënës i ERE, dhe as i OSSHE. Ndoshta gabohem ?!”, shprehet Shano.