Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Mesazhi për të vëllanë gjyqtar: Ti nuk ke tri makina, por kërkon të bësh tri punë. Ke një pasaportë, një grua, një atdhe

Politiko 22 Mars 2018, 17:25

Mesazhi për të vëllanë gjyqtar: Ti nuk ke tri makina, por

Politiko.al

(në foto gjyqtari Florjan Kalaja me familjen)

Gjyqtari Florjan Kalaja, një nga juristët e talentuar dhe të papërfolur për korrupsion të brezit të ri, ka promovura dje në mjediset e Muzeut Historik Kombëtar librin 'Dilema Kushtetuese II'. Ky është libri i tretë i gjyqtarit, i cili është prezent në shtypin e përditshëm me analiza që lidhen me sistemin gjyqësor në Shqipëri. Në promovimin e librit të gjyqtarit Kalaja kanë marrë pjesë ekspertë të jurisprudencës, politikanë dhe gazetarë. Një fjalë përshëndetëse kanë mbajtur juristët e njohur Kristaq Traja, Xhevahir Zaganjori dhe Sokol Sadushi. Ajo që ra më shumë në sy ishte fjala e gjetur dhe emocionuese e të vëllait të vogël të Kalasë, Aulonit, gazetar dhe aktivist i shoqërisë civile. Ai tha se e ka patur të vështirë teksa rritej, sepse të gjithë i kërkonin të bëhej si i vëllai, Flori, madje edhe prindërit.

Auloni ka kujtuar se, në gjashtë vjet që i vëllai ka qenë gjyqtar, ai ka pritur ndërhyrje, por kjo nuk ka ndodhur kurrë. Ai i tha sallës, duke shigjetuar me stil një komunitet të përfolur për korrupsion se Flori nuk ka tri makina, por kërkon të bëjë tri punë.

Fjala e plotë e Aulon Kalasë:

Natyrisht që është e vështirë për dikë të flasë për të vëllanë në këtë ditë kaq domethënëse për të. Por do shpreh disa fjalë zemre, sepse teknikalitetet do ua lë profesionistëve të fushës.

Kam krenari legjitime për Florjanin dhe jam i privilegjuar. Kam qenë gjithë jetës në fakt, sepse shembullin e kisha në shtëpi, dhe nuk duhet t’a kërkoja nëpër filma.

Për këtë arsye mami dhe babi që janë aty, më kanë përndjekur duke më thënë, 'bëhu si Flori'!, përveç mësueses se Kimisë në gjimnaz, që më kërkonte të bëja të kundërtën.

Më ka përndjekur emri i tij kudo. Hije e rëndë, apo jo. E vështirë për të treguar individualitet, kur ke vëlla Florin, sepse në shkollë edhe kur hartimet i bëja vetë, më thonin: “dora e Florit kjo”.

Në Vlorë për shembull, ku Flori shërbeu për gati 6 vite si gjyqtar i shkallës së parë, më thoshin 'bëhu si Floriri!'.

Kam menduar gjithmonë se do e kisha disi të vështirë jetën, sepse tek unë si vëlla gjyqtari do dyndeshin palët, për të kërkuar ndere apo ndërhyrje, por e kundërta ndodh. Flori m’i hoqi qafe ata me punën e tij, aq sa herë pas here mendoja se ky njeri e ka lënë punën si gjyqtar, dhe ndoshta filluar punë fjala bie, në Federatën e Aeronautikës, për hedhje me parashutë, ku askush nuk bën ndërhyrje, sepse është një fushë e panjohur.

Më ka shqetësuar fakti se si Flori e ka tepruar, e ke shtuar një çikë dorën, sepse librin e parë “Gjykimi në mungesë në procesin civil” e bëri me 329 faqe, librin e tij të dytë “Dilema Kushtetuese” me 429 faqe, ndërsa këtë të tretin me 522 faqe. Po mendoj se me këtë progresion, librin tjetër do t’a bëjë akoma më me shumë volum, por shpresoj që me të njëjtin çmim.

Jam krenar që e kam blerë i pari këtë libër. Tentoi të ma dhuronte, por nuk pranova. Vetëm se bëmë një pakt. I kërkova që të më shpjegonte nga një kapitull për fundjavë. Kemi ecur mirë, jemi tek kapitulli shtatë. Herë e kuptoj dhe herë bëj sikur. Të më ndjesh, vëlla. Kështu ndodh me gjithë vëllezërit e shkencëtarëve.

Tani jam duke imagjinuar se si do të duket vajza e tij Maria, së cilës ai ia dedikon këtë libër (nuk ka mbushur ende 1 vjeç). Si do të duket ajo kur të dalë në treg “Dilema Kushtetuese 7” dhe Maria të futet në klasën e parë, me këtë libër në çantë. Do ia blej unë, ju premtoj.

U ndjeva shumë mirë, kur një nga kolegët e tu, më tha se në një nga Konferencat gjyqësore, ti kishe ngritur zërin dhe kishe kërkuar rritjen e pagave për gjyqtarët. Paga qesharake, por e rrallë si kërkesë në këtë fushë apo jo?!

Jam krenar edhe për diçka tjetër, sepse vërtetë ti nuk ke tri makina, por kërkon të bësh tri punë. Nuk ke tri shtëpi, por ke shkruar tre libra. Ke një pasaportë, një atdhe, një grua. Flor, të gjitha që përmenda mbaji nga 1, por te fëmijët ec një çik më shpejt, sepse unë si xhaxha, mezi po pres të bëhem me nip.

Unë e di që ti nuk do ndalesh, sepse vitin tjetër do na mbledhësh sërish këtu për librin “Dilema Kushtetuese 3”, por më beso që emocioni im do të jetë po i njëjtë. Ndërsa presioni mbi mua edhe më i madh.

Të gjithë do më thonë “bëhu si Flori”, bëhu si yt vëlla. Bëhu si ai…