Bozdo: PS në panik po përgatit blerje votash

Partia Demokratike dhe Drejtuesi politik i PD-së për qarkun Berat, Eno Bozdo, ka denoncuar sot Partinë Socialiste për blerjen e votave dhe manipulimin e procesit zgjedhor.

Bozdo deklaroi se në prag të ditës së votimit Partia Socialiste po përdor taktika të paligjshme për të siguruar mbështetje në këmbim të favoreve të jashtëligjshme.

Bozdo njoftoi se Partia Demokratike ka në dispozicion prova dhe dëshmi që vërtetojnë operacionet e blerjes së votave në disa zona, dhe bëri thirrje për një reagim të menjëhershëm nga autoritetet ligjore për të ndaluar këto praktika të paligjshme.

DEKLARATA:

Përshëndetje,

 Ndërsa kemi hyrë në javën e fundit të fushatës zgjedhore,  e dimë se sipas traditës më të mirë të 12 viteve të fundit, kjo është java ku Partia Socialiste ble vota me shumicë, kesh apo me ndihma, me premtime për legalizime, vende pune, heqje gjobash etj.

Kjo është java ku vullneti i popullit tjetërsohet rëndë dhe ku maxhoranca e sotme aktuale ka varur cdo shpresë për fitore.

Ne kemi në dispozicion dëshmitë dhe informacionet e para para se fenomene të tilla po programohen të ndodhin. Ne kemi dijeni për emra dhe mbiemra, zonat që po operojnë, për përsonat që u kanë premtuar gjithcka të paligjshme në këmbim të votës.

Jam këtu përpara jush për të deklaruar se Partia Demokratike është në terren, në monitorim të plotë të situatës, me strukturat e saj mobile territoriale të cilat kanë në vëzhgim cdo cep të territorit dhe cdo person të dyshuar.

Jam këtu për të bërë me dije cilindo që do të përfshihet në akte të shitblerjes së votës, se jo vetëm do të denoncohen publikisht por do të shpallet “terrorist elektoral” nga Partia Demokratike dhe se mbi të do të godasë pa asnjë mëdyshje ligji dhe drejtësia.

I bëjmë thirrje Policisë se Shtetit dhe SPAK, dy strukturave kryesore të garantimit të një procesi zgjedhor të drejtë dhe transparent, se është casti tyre të provojnë se janë jo vetëm të paanshëm, por edhe shërbëtorë të ligjit, në dobi të Shqipërisë.

Ne nuk kërkojmë tensione apo konfrontim, por vetëm zbatimin e ligjit. Ne do të sinjalizojmë menjeherë strukturat e mësipërme por cdo rast të shkeljes së ligjit zgjedhor. Ne nuk do të lejojmë asnjë votë të tjetërsohet, asnjë votë të vidhet apo të blihet. Ne presim që strukturat ligjzbatuese të operojnë menjëherë pa humbur kohur kohë.

Ne duam që qytetarët shqiptarët të votojnë të lirë dhe të pakërcënuar. Por të jeni të sigurtë, se asnjë votë nuk preket, asnjë votë nuk tjetërsohet. Mjerë ata që nuk i bëjnë llogaritë me ligjin dhe vendosmërinë e demokratëve për të respektuar deri më një vullnetin e zgjedhësve!

Ju faleminderit!