OKB: Gaza në kolaps bujqësor, vetëm 5% e tokës mbetet e punueshme

Organizata e Kombeve të Bashkuara ka paralajmëruar se më pak se 5% e tokës së Gazës është aktualisht e përshtatshme për kultivim, si pasojë e dëmeve masive të shkaktuara nga lufta dhe kufizimeve të rrepta të aksesit.

“Ky nivel shkatërrimi nuk është vetëm humbje e infrastrukturës, është shembja e sistemit agroushqimor dhe linjave të jetës në Gaza”, deklaroi zëvendësdrejtori i përgjithshëm i Organizatës së Ushqimit dhe Bujqësisë (FAO) pranë OKB-së.

Sipas raportit, aktualisht vetëm 668 hektarë tokë që përfaqëson 4.6% të sipërfaqes së përgjithshme të Gazës janë të disponueshme për bujqësi. Përpara shpërthimit të konfliktit midis Izraelit dhe Hamasit në fund të vitit 2023, fermerët në Gaza kishin arritur të kultivonin fruta, hurma dhe ullinj, pavarësisht densitetit të lartë të popullsisë dhe kufizimeve ekzistuese.

OKB thekson se mbi 80% e tokës së punueshme është dëmtuar rëndë nga bombardimet, duke e bërë pothuajse të pamundur prodhimin e ushqimit dhe rikthimin e jetesës për mijëra familje.

Ndërkohë, situata humanitare në territor përkeqësohet çdo ditë. Të paktën 24 palestinezë, përfshirë fëmijë, u vranë gjatë dy sulmeve ajrore izraelite gjatë natës në Rripin e Gazës, njoftoi Mbrojtja Civile dhe stafi mjekësor lokal.

Një nga sulmet më të rënda goditi shkollën Fahmi Al-Jargawi në qytetin e Gazës, e cila strehonte qindra familje të zhvendosura nga Beit Lahia. Mbrojtja Civile raportoi se nga rrënojat u nxorën 20 trupa, mes tyre shumë fëmijë, pasi flakët përfshinë disa klasa të shndërruara në banesa emergjente.

Ushtria izraelite tha se kishte goditur një “qendër komande dhe kontrolli” të Hamasit dhe Xhihadit Islamik, duke akuzuar grupet militante për përdorim të civilëve si mburojë njerëzore.

“Flaka kishte kudo. Pashë trupa të djegur të shtrirë në tokë,” tha Rami Rafiq, një banor lokal që pa pasojat e sulmit nga afër.

Një tjetër sulm ajror goditi një shtëpi në qendër të qytetit të Gazës, duke shkaktuar katër viktima të tjera, sipas ministrisë së shëndetësisë të drejtuar nga Hamasi. Të premten, një sulm tjetër izraelit vrau nëntë nga dhjetë fëmijët e mjekes palestineze Dr. Alaa al-Najjar, ndërsa djali i saj 11-vjeçar dhe bashkëshorti ndodhen në gjendje kritike.

Të shtunën, Kryqi i Kuq konfirmoi vrasjen e dy punonjësve të tij në një sulm ndaj banesës së tyre në Khan Younis, duke dënuar ashpër humbjen e jetëve civile.

Situata vazhdon të jetë dramatike për shkak të bllokadës izraelite 11-javëshe, me ndihmat humanitare që futen vetëm në sasi minimale.

Të dielën, në Madrid u mbajt një takim ndërkombëtar me përfaqësues nga 20 vende dhe organizata, ku u diskutua për ndalimin e luftës dhe u propozua një embargo ndërkombëtare armësh ndaj Izraelit në rast se operacionet ushtarake nuk ndalen.

Që nga shpërthimi i konfliktit më 7 tetor 2023, mbi 53,900 persona janë vrarë në Gaza, përfshirë të paktën 16,500 fëmijë, sipas të dhënave zyrtare të ministrisë së shëndetësisë në territor.