Rreziku i pushtimit të Ukrainës/ Sot takimi Biden-Putin, çfarë pritet

Presidenti i SHBA Joe Biden dhe homolgu i tij rus Vladimir Putin do të zhvillojnë një video-takim të shumëpritur ditën e sotme në mes të tensioneve të përshkallëzuara rreth Ukrainës.

Përpara bisedimeve, Biden është konsultuar në telefon me aleatët evropianë për grumbullimin e trupave ruse në kufirin me Ukrainën, me synimin për të koordinuar mesazhet dhe sanksionet e mundshme ekonomike kundër Moskës.

“Ne kemi një rrugë përpara që do të impononte dëm të konsiderueshëm dhe të rëndë në ekonominë ruse,” nëse Kremlini do të pushtonte Ukrainën, tha të hënën sekretarja e shtypit e Shtëpisë së Bardhë, Jen Psaki.

Uashingtoni dhe Kievi thonë se Moska ka grumbulluar trupa pranë kufijve të Ukrainës dhe akuzojnë Rusinë për planifikimin e një pushtimi. Biden tha të premten se do ia bënte Rusisë "shumë, shumë të vështirë" planin e pushtimit.

Moska ka mohuar çdo qëllim agresiv dhe ka akuzuar perëndimin për provokim, veçanërisht me stërvitjet ushtarake në Detin e Zi. Një pyetje kyçe që varet gjatë bisedimeve është nëse Putini mund të fillojë në të vërtetë një ofensivë ndërkufitare, apo nëse ai po përdor trupat për të bërë presion ndaj Bidenit për garanci që Ukraina nuk do të anëtarësohet kurrë në NATO.

Një zyrtar i lartë i Shtëpisë së Bardhë tha të hënën se Uashingtoni do t'i jepte një "përgjigje pozitive" një kërkese të mundshme të aleatëve për të rritur praninë e tij ushtarake në Evropën Lindore në rast të një sulmi rus në Ukrainë.

Një zyrtar tjetër i administratës tha gjithashtu se SHBA nuk ka përcaktuar nëse Putin ka marrë një vendim përfundimtar për një pushtim të mundshëm. Megjithatë, Biden në thirrjen e sotme synon t'i bëjë të qartë udhëheqësit rus se do të ketë një "kosto shumë reale" nëse Rusia zgjedh të pushtojë, tha zyrtari.

Biden gjithashtu ka planifikuar të flasë me presidentin ukrainas Volodymyr Zelenskyy në ditët në vijim pas telefonatës së tij me Putinin, tha zyrtari i administratës.

Moska nuk pret "asnjë përparim"

Kremlini tha më herët të hënën se Moska nuk pret "përparime" nga takimi. Javën e kaluar, Putini u shpreh do të kërkonte garanci detyruese nga Biden që do të përjashtonin zgjerimin e NATO-s në Ukrainë. Biden dhe ndihmësit kanë treguar se një garanci e tillë nuk ka të ngjarë.

Zyrtarët amerikanë dhe ish-diplomatët amerikanë thonë se ushtria e Ukrainës është më e armatosur dhe e përgatitur sot se në të kaluarën, dhe se sanksionet e kërcënuara nga perëndimi do të dëmtonin seriozisht ekonominë ruse

Zëdhënësi i Kremlinit Dmitry Peskov, gjatë konferencës së tij të përditshme me gazetarët, tha të hënën se marrëdhëniet SHBA-Rusi janë në "një gjendje mjaft të rëndë", por se Kremlini mezi pret të dëgjojë se çfarë ka për të thënë Biden.

"Unë mendoj se presidenti Putin do t'i dëgjojë këto propozime me shumë interes. Dhe ne do të jemi në gjendje të shohim se sa këto (propozime) do të jenë në gjendje të qetësojnë tensionet", i tha Peskov stacionit televiziv shtetëror të Rusisë.

Përveç Ukrainës, Biden dhe Putin pritet gjithashtu të trajtojnë sigurinë kibernetike, programin bërthamor të Iranit dhe çështje të tjera me interes të përbashkët.

Burimi: Euronews