Vetëvrasja e emigrantit maroken, aktivistja: Ka kushte çnjerëzore në Gjadër

Aktivistja Kristina Millona foli mbi protestën e zhvilluar sot në kampin e Gjadrit pas aktit të vetëvrasjes së emigrantit maroken në burgun e Torinos sapo ishte kthyer nga kampi i Gjadrit në Shqipëri.

Duke folur lidhur me kushtet në kamp në MCN TV, ajo tha se është një regjistër i incidenteve shqetësuese, si tentativa për vetëlëndim nga emigrantët e vendosur brenda këtyre strukturave apo edhe kushteve çnjerëzore.

Sipas saj, emigrantët transportohen të prangosur dhe në shumicën e rasteve as nuk janë në dijeni se do të dërgohen në Shqipëri.

"Informacionet që ne marrim janë shumë të limituara, si aktiviste dhe gazetare që kam ndjekur marrëveshjen, informacionet vijnë nga grupet e monitorimit nga Italia, deputetë dhe përfaqësues ligjor.

Nga bisedat e zhvilluara nga grupet e monitorimit kemi parë zhvillime shqetësuese. Është një regjistër i incidenteve shqetësuese, si tentativa për vetëlëndim nga emigrantët e vendosur brenda këtyre strukturave.

Tregohet edhe për kushte çnjerëzore ku ndodhen këta emigrantë. Transportohen të prangosur, në shumicën e rasteve emigrantët as nuk janë në dijeni se do vijnë në një vend si Shqipëria, në kampin e Gjadrit.

Problematikë tjetër është kufizimi në mbrojtjen ligjore. Kanë një limit kohor prej 20 minutash për të folur nga centrali i Gjadrit, për të folur me avokatët apo familjarët. 

Mediat italiane kanë zbuluar se një emigrant në Gjadër është i prekur me Hiv. Janë një sërë problematikash që tregojnë se situata në Gjadër sa vjen e rëndohet dhe shumë shoqata dhe organizata kërkojnë mbylljen e kampit të Gjadrit.

Lajmin e vetëvrasjes e kemi marrë vesh nga mediat italiane. I ndjeri i ka dhënë fund jetës 28 orë para se të merrte vendimin gjyqësor dhe vetë avokati që po e përfaqësonte ligjërisht, shpesh ishte shprehur se si ndihej keq në këto struktura dhe se si një muaj e dy ditë në Gjadër, gjendja e tij psikologjike ishte rënduar.

Kishte shprehur shqetësimin se më mirë në burg në Itali se sa në kampin e Gjadrit. Përdoret gjuhë denigruese ndaj emigrantëve në kamp.

Nuk dihet se sa është numri total i emigrantëve që mbahen në kamp, as nga vetë eurodeputetët që autorizohen të hyjnë brenda.

Ka vërtetë një terr informacioni, sa i përket numrit të personave që mbahen në Gjadër.

Në total qëndrimi duhet të jetë maksimumi 18 muaj, por bëhet një rivlerësim çdo tre muaj, se ndonjëherë ndodh që ka ekspertizë mjekësore që e deklaron një person të papërshtatshëm për të qëndruar brenda këtyre strukturave.

Brenda këtyre strukturave aplikohet legjislacioni italian. Edhe pse organizata të ndryshme janë shprehur se është e pamundur të aplikohet legjislacioni italian njëlloj si në Bashkimin Europian.

Përgjegjësitë e shtetit shqiptar janë shumë të kufizuara, se është parimi i ekstraterritorialitetit dhe ajo tashmë quhet tokë italiane, por ka dhe angazhim të strukturave të jashtme, pasi perimetri i jashtëm ruhet nga policë shqiptarë që bëjnë patrullimin e zonës.

Vetëm se është nën juridiksionin italian, nuk do të thotë se organizatat e shoqërisë civile nuk duhet të ngrënë zërin", tha ajo.