Erion Piciri: Nismë ligjore për privilegjet e deputetëve, nuk i meritojnë

Deputeti i opozitës parlamentare Erion Piciri ka paralajmëruar se shumë shpejt do të ketë një nismë ligjore ku do t’u hiqen privilegjet deputetëve shqiptarë. Ai mendon se duhet një reagim ndaj faktit që shumë shqiptarë shkruajnë dhe protestojnë ndaj cilësisë së parlamentit dhe privilegjeve të pamerituara të deputetëve.

“Analizuar me situatën e vendit, besueshmërinë e institucionit, krahasimin me profesione të tjera në nivel kombëtar dhe me raportet e pagave të homologëve europianë me rrogën mesatare të vendeve të tyre, arrin në përfundimin se njerëzit kanë të drejtë, se statusi i deputetit për shumë arsye ka nevojë të rishikohet dhe të krasitetet nga përfitimet e ekzagjeruara. Një klasë politike që humbet lidhjen me realitetin, që abuzon financiarisht me pushtetin, fyen popullatën, lë shteg për pakënaqësi sociale dhe rritjen e rrymave populiste dhe radikale. Rruga më e mirë është ndërlidhja me mjedisin rrethues, korrigjimi i përhershëm dhe kthimi në normalitet.”, shkroi ai në Facebook.

Piciri mendon se situata në Shqipëri është mjaft e rëndë, e nisur nga fakti që qytetarët vuajnë, deputetët nuk duhet të kenë privilegje të tilla të pamerituara.

“Në vendin ku rroga mesatare është 526 mijë lekë të vjetra, rroga bazë e një deputeti nuk mund të jetë sa trefishi i saj, 1 milion e 567 mijë. Nëse i shtohen pagesat ekstra për komisionet, karburantin, telefonit, dietave e të tjera benefite, ajo shkon sa afro pesë fishi i rrogës mesatare. Ky është një absurditet i shkëputur shumë nga paga mesatare e shqiptarit dhe pagat e tjera në sektorin publik. Nuk mund t’i jepet deputetit (jo në pak raste me formim të munguar), një pagë më e lartë se e një profesori universitar apo kirurgu.”, vazhdoi ai duke shpjeguar se pothuajse të gjithë vendet evropiane e kanë rrogën e parlamentarit pak më të lartë ose sa dyfishi i rrogës mesatare.

Iniciativa për uljen e saj edhe nga vetë deputetët ka pasur në Poloni, Itali, Spanjë e vende te tjera.

“Kur paga mesatare mujore e mjekëve 820 mijë lekë të vjetra (profesionistë që na i kërkon bota), ne nuk mund t’i japim trefishin një deputeti që dobinë ia sheh kryesisht prijësi e partia, më pak shoqëria.”

Ai tregoi objektivat që ka për statusin deputetit.

“- Uljen me 30% të rrogës së deputetëve.

– Tërheqjen e pagesës 470 mijë lekë të vjetra të karburantit dhe telefonit.

– Tërheqjen e mundësisë për strehim dhe kredi me lehtësira apo për të futur mallra pa doganë.

– Tërheqjen e gjysmës së rrogës deri në tre vjet mbas mbarimit të mandatit dhe të pensionit suplementar.

– Tërheqjen e mundësisë për kurim jashtë kur këtë nuk e gëzojnë as fëmijët e sëmurë rëndë të vendit.”