Raporti i PE për Shqipërinë, Komisioni Evropian për Politiko: Shqipëria ecën përpara, por reformat nuk janë të mbyllura

Suela Gjidede

Pas miratimit të raportit të fundit të Parlamentit Evropian për Shqipërinë, i cili ka ngritur shqetësimet mbi funksionimin demokratik të institucioneve, ndërhyrjen e aktorëve të huaj dhe përdorimin e burimeve shtetërore në zgjedhejet e 11 majit, vëmendja është zhvendosur drejt pritshmërive që Bashkimi Evropian ka për përshpejtimin e reformave kyçe në vend.

Për të sqaruar pozicionin e BE-së pas publikimit të raportit, Politiko.al kërkoi një koment nga Komisioni Evropian mbi përparimin e Shqipërisë dhe sfidat që ende mbeten në procesin e integrimit evropian.

Në përgjigjen e dhënë nga një zëdhënës i Komisionit, BE thekson se Shqipëria ka bërë përparim në disa fusha kyçe të integrimit, si drejtësia dhe lufta kundër korrupsionit.

"Anëtarësimi në BE është një proces i bazuar në meritë - dhe secili kandidat vlerësohet për progresin e tij drejt përmbushjes së të gjitha kritereve.

Në këtë kontekst, BE dhe Shqipëria hapën negociatat për grupin themelor në tetor 2024. Shqipëria vazhdon të bëjë përparim në grupin themelor, veçanërisht në reformën gjithëpërfshirëse të drejtësisë, procesin e verifikimit, rritjen e kapacitetit për hetime financiare kundër krimit të organizuar dhe rezultate të mira në rastet kundër korrupsionit", thuhet në përgjigjen e KE për Politiko.al. 

Megjithatë, theksohet se duhet të intensifikohen reformat në sundimin e ligjit, lirinë e medias dhe të drejtat e njeriut, për të garantuar një proces të qëndrueshëm dhe të besueshëm të anëtarësimit në Bashkimin Evropian.

"Është thelbësore të intensifikohen reformat në sundimin e ligjit, duke konsoliduar progresin në luftën kundër korrupsionit dhe krimit të organizuar, dhe promovimin e të drejtave të njeriut, veçanërisht në lirinë e medias, të drejtat e pronës dhe pakicat", thekson zëdhënësi i Komisionit Evropian. 

Po ashtu, në këtë reagim zyrtar, rikonfirmohet edhe angazhimi i BE-së për të çuar përpara procesin e anëtarësimit me hapa konkretë gjatë vitit 2025.

"Përputhja e plotë e Shqipërisë me Politikën e Përbashkët të Jashtme dhe të Sigurisë (CFSP) të BE-së dëshmon për rolin e saj si një partner i besueshëm ndërkombëtar dhe zgjedhjen e saj strategjike të pranimit në BE. Në fakt, Grupi 6 mbi marrëdhëniet e jashtme u hap dhjetorin e kaluar.

Gjatë javëve të fundit, ne kemi hapur edhe një grup shtesë, gjë që tregon progresin e mirë që është bërë (Grupi 3 mbi 'Konkurrueshmërinë dhe rritjen gjithëpërfshirëse' në maj dhe Grupi mbi Tregun e Brendshëm në prill).

Deri më sot, numri i përgjithshëm i kapitujve që po negociohen tani është 17. Raporte të tjera shqyrtimi janë dërguar gjithashtu në Këshill, për të cilat presim një ndjekje të shpejtë. Qëllimi ynë është të hapim të gjitha grupimet e mbetura gjatë vitit 2025", përfundon zëdhënësi i KE./Politiko.al/