Glos: Tarifat e studentëve të larta; më pushon zemra kur mbush makinën me karburant

Drejtori i Fondacionit ‘Konrad Adenauer’ në Shqipëri, Walter Glos ka dalë në mbështetje të studentëve, të cilët vijojnë sërish protestën, sot në ditën e tetë.
Gjatë një takimi të AMA dhe KAS për shpalljen e “Trajnimit te gazetareve lokale gjatë fushatës së zgjedhjeve lokale 2019”, Glos tha se studentët duhet të kuptohen, pasi tarifat e tyre janë shumë të larta.

“Mund t’i kuptoj studentët. Ata që kanë qenë në konvikte e kuptojnë se pse ata ngrihen. Tarifat studentore ne Shqipëri janë të larta edhe krahasuar me Gjermaninë”, u shpreh zyrtari gjerman, ndërsa u ndal edhe te çmimi i lartë i karburantit në Shqipëri.

“Kur shkoj te mbush makinën me karburant pothuaj më pushon zemra. Nuk dal dot para kamerave të them se gjërat janë mirë”, tha ai, raporton politiko.al.