OP-ED

Nuk është programi, budalla!

Nuk është programi, budalla!

Nga Alfred Lela 

Titulli cinik nuk sugjeron zhgënjimin tim me programin e Partisë Demokratike. Duhet thënë dhe theksuar, se një program, sado mesatar, apo qoftë dhe i keq, është më mirë se pa program fare. Të paktën PD e Bashës e ka një program, ndryshe nga PS e Ramës, që në vitin 2017, nuk paraqiti as edhe një tezë, as edhe një faqe me ide mbi menaxhimin e Shqipërisë.

Sigurisht, nëse nuk konsideron program fjalët ‘tepsi’, ‘kusi’, ‘timon’, ‘kazan’, e të tjera enë shtëpiake apo aksesorë automobilistikë.

Meqë programin e kemi, dhe është ai që është, duhet thënë se projektit qeverisës të PD i mungon filozofia. Ai nuk i bashkon pjesët në një, duke dëshmuar se do të arrijë këtë apo atë gjë madhore. Nuk na thotë se në ç’sektorë do i hapë ato 110 mijë vende pune, pra cila është filozofia e qeverisjes: industrializimi, shërbimet apo teknologjia e lartë.

Ajo çka mund të konsiderohet filozofi, ose mungesë e saj, është doza e lartë e populizmit. PD duket se ka pajtuar qasje të majta, duke ofruar shumë për popullin nga buxheti i shtetit, por pa thënë se si do ta mbushë arkën. Taksimi i ulët dhe ulja e korrupsionit janë për t’u lëvduar, por ato nuk të çojnë dot deri te ky qëllim, i cili ka kosto.

Nuk janë këto mungesa që e bëjnë dyshues syrin e vëmendshëm ndaj programit të PD. Një forcë politike duhet ta dëshmojë se e ka seriozisht, së pari, dhe se kërkon ardhjen në pushtet për interesat e publikut dhe jo të një klike të cilën përfaqëson. I mësuar me grupe që ndërrojnë vend dhe vozisin në dhjamin që krijojnë nga ndarja e gjësë publike, njerëzit janë mosbesues. Edhe përballë programit më të shkëlqyer. Edhe po ta kishte shkruar Muhameti apo Krishti.

Këtu PD mund ta bëjë ndarjen me veten, të shkuarën dhe të tjerët. Një grup, i cili me veprimet dhe jo fjalët, dëshmon se e do pushtetin jo për të ndërruar programin e vjedhjes, por filozofinë e shtetit dhe menaxhimit të tij. Pa këtë të gjitha janë fjalë, edhe pse titulli i tyre mund të jetë impresionues e të quhet ‘program’.

Në fund, nuk është programi, budalla! 

Ditari politik

Të fundit