Flash News
Posta e mëngjesit/ Me 2 rreshta: Çfarë pati rëndësi dje në Shqipëri
E rëndë në Krujë/ 42 vjeçarja futi në qese dhe hodhi në lumë foshnjën e porsalindur në shtëpi
Presidenti Begaj dekreton ligjin për zonat e mbrojtura
Mbytet në ujin e shatërvanit një i mitur afgan në Shëngjin
“Minuan sundimin e ligjit”, DASH shpall ‘non grata’ tre zyrtarë të lartë në Ballkan
Arrestohen 12 ultras të Juventusit, dyshohen për aktivitet kriminal
Dymbëdhjetë drejtues të tifozëve ultras të Juventusit janë arrestuar, pasi dyshohen për krime të ndryshte si pastrim parash, dhunë dhe zhvatje të shumave të mëdha nga shitja e biletave.
Sipas të përditshmes britanike “The Guardian”, të dyshuarit i kanë kërcënuar zyrtarët që merren me shitjet e biletave, se do të këndonin këngë dhe thirrje raciste gjatë ndeshjeve të Seria A, nëse ata nuk do u jepnin blloqe biletash me çmime të ulëta që ultrasit më pas t’ua shisnin tifozëve.
Klube të ndryshme sportive janë gjobitur dhe u janë hequr pikë për shkak të koreve raciste në stadium. Krerët e ultrasve të skuadrës së Juventusit e kanë shfrytëzuar këtë rast për të shtënë në dorë biletat e ndeshjeve të kampionatit italian, pasi në vitin 2017 Juventusi e ndaloi shpërndarjen e blloqeve të biletave për shitje.
Hetimi nga prokurorët e Torinos, i cili u krye me ndihmën e forcave të policisë në të gjithë Italinë qendrore dhe veriore, filloi vitin e kaluar pas një ankese nga kampionët e Italisë. Hetimet pretendojnë se në këtë mes ka dorë mafia.
Policia tha që të arrestuarit kishin krijuar një "strategji të gjerë kriminale për të" rikthyer "favorizimet e humbura".
Juventusi u gjobit në vitin 2017 dhe presidenti i këtij klubi, Andrea Agnelli, e ndaloi për një vit skemën e dhënies së biletave falas për tifozët ultras, e cila pretendohej se bëhej për të garantuar paqen në stadium.
Ultrasit italianë janë mjaft të organizuar, shumë të dhunshëm dhe racistë. Në muajin gusht filloi një hetim për vrasje pasi Fabrizio Piscitelli, një anëtar drejtues i ultrasve të Lazio-s, u qëllua për vdekje në një park në Romë.
Ultrasit e Lazio-s, të njohur edhe si Irriducibili, kanë qenë të lidhur me disa akte racizmi dhe antisemitizmi që kanë dëmtuar këtë klub vitet e fundit.
Në prill, ata i thurën lavde diktatorit fashist Benito Mussolini në Milano përpara një ndeshje të Kupës së Italisë midis Lazios dhe AC Milan-it. Dy lojtarë të Milan-it ishin gjithashtu viktima të koreve raciste gjatë ndeshjes.
Arrestimet e ultrasve të Juventusit ditën e hënë erdhën pas pushimit nga puna të një gazetari sportive italian, i cili bëri disa vërejtje raciste në lidhje me lojtarin e Interit, Romelu Lukaku. Gazetari italian, Luciano Passiorani, ishte i ftuar në programin televiziv “Qui Studio a Voi Stadio”. Ai tha se e vetmja mënyrë për të ndaluar Lukakun ishte t’i jepte “10 banane për të ngrënë”.
Përktheu: Politiko.al