"27 vjet vetmi"/ Pas udhërit të Ramës, Veliaj fillon bën llogaritë sa do rrijë brenda në burg

Kryebashkiaku i Tiranës, Erion Veliaj, ka reaguar përmes një postimi në Facebook, ku e cilëson arrestimin e tij si një padrejtësi dhe e krahason me romanin e Kafkës, Procesi.

Në mesazhin e tij, Veliaj shtron pyetjen se përse ndodhet në burg, ndërsa thekson se është dënuar pa prova dhe pa një proces të rregullt gjyqësor.

Ai ironizon akuzat ndaj tij, duke vënë në dukje se dyshohet për korrupsion dhe pastrim parash që nga viti 2004, në një kohë kur ishte vetëm 25 vjeç dhe nuk kishte njohje me personat e përmendur në dosje.

Po nëse deri dje ka menduar se ka një fije përkrahje edhe nga partia, mbrëmë është fashitur edhe kjo shpresë.

Mesa duket Veliajt i ka shkuar në burg lajmi se Rama ka dhënë urdhër që askush mos ta mbrojë më Lali Erin, ose të japin dorëheqje nga të qenit deputet dhe ta mbrojnë, këtu kishte përdorur si preteks daljen e deputetit Etjen Xhafaj në një studio televizive ku kishte mbrojtur Veliajn dhe deklaruar se ai është i pafajshëm.

Postimi i Veliajt:

27 vjet vetmi

Mirëdita dhe agjërim të lehtë të gjithë vëllezërve dhe motrave. Duke qenë se e keqja as nuk agjëron, as nuk pushon, por ushqehet përditë me ligësi dhe mashtrim, lipset që edhe unë, edhe ne, ta luftojmë përditë haramin që na rrethon.

Pasi u procedova me letrën anonime të Nesti Angonit, pasi u shpalla “i dënuar” që në faqe të parë, dhe pasi u parashtruan “krimet” që variojnë nga lodrat e djalit, te fushata në Rrogozhinë e Kavajë, dhe nga statuset e Facebook-ut tek ato në Instagram, lind pyetja: Po në burg pse jam? Thosh edhe Kafka te “Procesi”, mirë që jam fajtor pa faje e pa fakte, po dënimin pa gjyq pse?

Tre janë faktorët që duhet të ketë parasysh Gjykata: rreziku i ikjes, prishja e provave dhe rrezikshmëria shoqërore. T’i marrim me rradhë: Rreziku i ikjes Gjyqtari Bani arsyeton se meqë Ols Dado më akuzon për vepra që dënohen me 12 dhe 15 vjet - pra, 27 vite burg - unë do ikja nga Shqipëria.

Po, po, ja lexojeni: “Mund të arrihet në përfundimin logjik ligjor në formën e mundësisë së arsyeshme, mbi mundësinë reale të ikjes nëse nuk ndërhyhet për të caktuar një masë shtrënguese për këtë shtetas”.

Dyshohem nga Ols Dado se kam konsumuar 9 herë veprën penale të “Korrupsionit Pasiv të funksionarëve të lartë shtetëror ose i të zgjedhurëve vendor”, kryer në bashkëpunim, duke filluar që nga viti 2004, në moshën 25 vjeçare, bashkëpunim me persona që as i kam njohur atëherë dhe as kam parashikuar që do i njihja në të ardhmen. Dyshohem nga Ols Dado se kam kryer më shumë se një herë veprën penale të “Pastrimit të produkteve të veprës penale ose vemprimtari kriminale”.

E kuptuat? Meqë Olsi do kërkojë 27 plus vite burg, më duhet të burgosem që pa nisur gjyqi fare. Po unë isha në Gjermani në ditën e bastisjes dhe u ktheva menjëherë! Udhëtova edhe 2 herë në SHBA në 30 dhjetor dhe 20 Janar dhe u ktheva sërish. Ku është rreziku?

Ku është arratisja? A nuk do mjaftonte masa e mbajtjes së pasaportës, që edhe ikja nga Olsi e Bani të mos cënohej, por edhe unë të vazhdoja punët për Tiranën, që s’duhet ndalur asnjë moment? Por, siç komentonte Kafka për përndjekësit e tij tek “Procesi”:

“Unë as e mendoj të iki nga këta dy përndjekës kaq shembullorë, të cilët më janë qepur pas me kaq zell dhe pasion, sa thuajse më dhimbsen t’i lë vetëm në gjykatë”. Kjo për rrezikun e ikjes, nesër e pasnesër do të flasim për rrezikshmërinë time të lartë shoqërore. Ju dua të gjithëve!