Flash News

Fuste dr*gë dhe sende të paligjshme në qeli, arrestohet polici i burgut të Drenovës

Lavrov: NATO po rrezikon vetëshkatërrimin me buxhetin e ri ushtarak

​Kurti e Vuçiç "përballen" nesër në Shkup

Bie nga skelat, humb jetën punëtori i ndërtimit në Berat

Prokuroria dërgon për gjykim dy zyrtarët e Bashkisë Korçë

Ditari i Maxhorancës

BIRN: Aleanca e pashpallur PS-PSD bëhet aleancë e kushtëzuar

Politiko 23 Prill 2025, 17:23

BIRN: Aleanca e pashpallur PS-PSD bëhet aleancë e kushtëzuar

Kryetari socialdemokrat Tom Doshi shpalli objektivin për të qenë pjesë e shumicës së ardhshme qeverisëse ndërsa shprehu pakënaqësi ndaj socialistëve të Edi Ramës dhe kritikoi caktimin e Benet Becit si drejtues fushate pavarësisht problemeve me drejtësinë.

Kryetari i Partisë Socialdemokrate Tom Doshi, i cili garon në Shkodër, shpalli objektivin për të marrë tre mandate deputetësh në këtë qark, shprehu për herë të parë në publik pakënaqësi ndaj socialistëve ndërsa mohoi idenë se mund të bëjë aleancë me Berishën.

Në një takim me elektoratin në Shkodër, politikani ish-socialist që është sanksionuar nga administrata e parë e Presidentit Trump për korrupsion madhor, kritikoi të dy partitë e mëdha për korrupsion dhe shtoi se atij i vjen turp që “gjysma e qeverisë është në burg dhe nën hetim”. Ai shënjestroi veçanërisht kryebashkiakun e Shkodrës Benet Beci, i cili është nën hetim ndërsa konfirmoi publikisht për herë të parë përplasjet me Partinë Socialiste, të cilën e ka mbështetur pa qenë në aleancë formale përgjatë tetë viteve të fundit.

“Kryetari i Bashkisë Shkodër që drejton fushatën e PS-së, është i pandehur. Si mund të drejtojë fushatën një njeri që ka vjedhur qytetarët,” deklaroi Doshi.

Doshi ishte deputet socialist për disa mandate por u përzu nga Rama në vitin 2015 dhe u zgjodh deputet në Shkodër për Partinë Socialdemokrate në vitin 2017. Në vitin 2018 ai u vendos nën sanksione nga qeveria e Shteteve të Bashkuara, drejtuar në atë kohë nga Presidenti Donald Trump. Doshi drejtoi partinë pa qenë deputet në zgjedhjet e vitit 2021 dhe fitoi tre mandate, dy në Shkodër dhe një në Tiranë.

Partia Socialdemokrate shënoi sukses të pazakontë në zgjedhjet për pushtetin vendor 2023, duke fituar 86 mijë vota dhe 116 mandate këshilltarësh. Votat e PSD-së në ato zgjedhje sugjerojnë synimin për mandate në disa qarqe të vendit, përfshirë Shkodrën, Lezhën, Kukësin, Dibrën, Tiranën e Fierin. Në Kukës, Dibër e Lezhë, votat e socialdemokratëve mundet të mos mjaftojnë për të fituar mandat, por, nëse gërryejnë nga radhët e njërës palë, mund të ndihmojnë palën tjetër, sepse në këto qarqe numri i mandateve është tek dhe formula e ndarjes së mandateve favorizon partinë që arrin të fitojë qoftë edhe një votë më shumë se sa konkurrentët.

Socialdemokratët garojnë në këto zgjedhje me shumë drejtorë të administratës aktuale të Partisë Socialiste, ndonëse marrëdhëniet e tyre me vëllain e madh nuk kanë qenë tërësisht të mira së fundmi. Kandidatët e PSD-së në Fier u ankuan për tentativa për pushime nga puna në sektorin publik, aludohet, për shkak të kandidimit për këtë parti.

Zyrtarisht PSD dhe PS nuk kanë qenë aleatë që nga koha kur kjo parti u vu nën drejtimin e Doshit ndërsa në ditët pas zgjedhjeve të vitit 2021, kur fati i maxhorancës qeverisëse të socialistëve ishte i paqartë, Doshi shpalli menjëherë publikisht mbështetjen për Edi Ramën. Tre deputetët e tij kanë votuar në kuvend rregullisht në mbështetje të socialistëve dhe së fundmi, Komisioni Qendror i Zgjedhjeve e klasifikoi këtë parti formalisht si pjesë e maxhorancës.

Ndryshe nga zgjedhjet e kaluara kur Doshi dukej se shërbente si guri rezervë i Ramës për krijimin e maxhorancës në rast se shqiptarët nuk i jepnin 71 mandate, kësaj here Doshi shpalli qëllimin për të qenë guri kyç, me forcën e mandateve të fituara në zgjedhje.

“…pa Partinë Social-Demokrate nuk ka mazhorancë në Shqipëri,” deklaroi ai ndërsa i kërkoi shqiptarëve votën nën premtimin se do të investojë në aparatura mjekësore për trajtimin e sëmundjes së kancerit, aparatura që aktualisht mungojnë në Shqipëri.

Rezultati i zgjedhjeve të shkuara në Shqipëri ka qenë me shumicë të thjeshtë por komode në numër mandatesh për socialistët në vitin 2017 dhe 2021 por mandatet shtesë mbi kuotën 71 kanë rezultuar gjithmonë të vështira për t’u kapur. Në zgjedhjet e vitit 2009, mandatet u ndanë 70 për PD-në, 66 për PS-në dhe 4 për LSI-në, gjë që ndihmoi këtë të fundit që të bëhej forca përcaktuese në shumicën qeverisëse, një pozicion që pas zgjedhjeve të 11 majit mund të mbahet nga socialdemokratët ose nga ndonjë apo disa nga partitë e vogla të reja garuese, të cilat mund të marrin mandate deputetësh kryesisht në Tiranë./BIRN

Të fundit