Rama për kritikët e 'Mini-Shengenit': Kush thotë që është projektuar në bodrumet e ish-Jugosllavisë jeton në botë paralele

Kryeministri Edi Rama

Në Forumin Ekonomik "Ballkani i hapur", që po zhvillohet në Shkup, kryeministri Edi Rama dhe liderët e tjerë nuk e humbën rastin për t'i dhënë mesazhe BE-së.

Duke e cilësuar projektin e "Mini-Shengenit" si shpëtim për ekonominë e Shqipërisë, Serbisë dhe Maqedonisë së Veriut, ata thanë se duhet të tregojnë aftësi dhe pavarësi.

Liderët u shprehen se do të punojnë për realizimin e këtij projekti, duke evidentuar edhe frytet e tij, ndërsa thanë se nuk do të presin BE-në, por do të ecin përpara me këtë nismë.

Në këtë takim, kryeministri i Kosovës Albin Kurti, mungoi. Gjatë fjaës së tij, Rama tha se kushdo që dëshiron mund t'i bashkohet kësaj nisme dhe duke nënkuptuar mungesën e Kurtit, ai tha se nuk mund të presim konsesus nga të gjithë.

"Sa herë duhet ta përsërisim që kjo nuk është nisëm ekskluzive e Shqipërisë, Maqedonisë së Veriut dhe Serbisë? Kushdo që dëshiron mund të na bashkohet, por nuk mund të presim konsensus nga të gjithë për t'u takuar. Se ne nuk mund të bëjmë karikaturë të BE që njëri të vendosë veton e të thotë jo nuk do takoheni. Ne nuk mund të humbasim kohë se kemi humbur shekuj. Kemi jetuar gjatë me kënaqësinë e vuajtjes së tjerëve, nuk kemi parë se çfarë fitojmë ne  nga bashkëpunimi, por sa keq heq tjetri nga konflikti. Ko është një histori e gjatë dhe e dhimbshme që duhet lënë pas", tha Rama.

Ky i fundit iu përgjigj edhe kritikësve të "Mini-Shengenit", teksa tha se kush mendon se kjo është një nismë e projektuar në bodrumet e ish-Jugosllavisë, jeton në një botë paralele.

“Kush thotë që kjo është një nismë e projektuar në bodrumet e ish-Jugosllavisë për të rikompozuar Jugosllavinë edhe për t’i dhënë hegjemoninë Serbisë, e para jeton në botë paralele, e dyta jeton për politikë në lëkurën e njerëzve dhe jo për rritjen e mirëqenies dhe harron që po të nisemi kështu atëherë duhet të themi edhe BE është një Jugosllavi e madhe.

 Nëse BE është një Jugosllavi e madhe, po kjo është Jugosllavia e vogël. Kjo është krijimi i një hapësire që jeton me vlerat dhe mekanizmat e BE ndërkohë që secili nga vendet bën përpjekjet e tij për tu integruar në BE. Për çfarë arsye kamionët e mallrave duhet të harxhojnë më shumë kohë në kufij se sa në udhëtim. Në emër të kujt ne duhet ta pranojmë këtë realitet. Në emër të historisë? Në emër të konflikteve? Të çështjeve të pazgjidhura?”, u shpreh kryeministri.

Ky i fundit us hpreh se nuk është nevoja për të pritur një "PO" nga BE, kur liritë thëmëlore të bllokut mund të realizohen edhe përmes 'Mini-Shengenit". Ai shtoi se rajoni nuk mund të mbetet peng i së shkuarës, duke theksuar se këto vende janë të vogla për të qëndruar vetëm, teksa shtoi se ka nevojë për bashkëpunim.

“Kjo nismë është gjëja e duhur, jo vetëm gjëja e duhur por ndryshe nga çfarë predikojnë disa është e vonuar. Ky rajon nuk mund të mbetet peng i së shkuarës në asnjë aspekt. Kush nuk e kupton se jemi të vegjël për të qëndruar të vetëm, për të krijuar ekonomi të fuqishme është i dënuar të jetojë në të kaluarën. Kjo nismë sjell një rajon një shembull kuptimplotë të BE-së duke jetësuar katër liritë themelore të BE.

Ne nuk duam te jetojmë në të shkuarën por duam të projektohemi në të ardhmen, përmes një nisme që sjell në këtë rajon shembullin e Bashkimit Europian dhe 4 liritë themelore: Të lëvizjes së njerëzve, kapitaleve, mallrave dhe shërbimeve.  Përse duhet të presim ne të mbyllur brenda kufijtë tanë me kurriz nga njëri-tjetri siç kemi ndenjur 500 vite ndërkohë që integrimi evropian ka kohën dhe kufizimin e vet jo vetëm nga ç’bëjmë ne por edhe çmendojnë të tjerët”, tha ndër të tjera Rama.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm