Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

Pak dritë, o princ...

Politiko 9 Korrik 2025, 15:46

Pak dritë, o princ...

Nga Jonathan Pano

Nikolo Makia­veli këshillonte princat e rinj të shkatërronin çdo ndikim të së kaluarës, të vendosnin ligje të reja dhe të shpërblenin ata që ndihmonin ndërtimin e besnikërisë së tyre. Por Rama nuk është princ i ri. Ai sundon prej 12 vitesh dhe sapo mori mandatin e katërt po përpiqet të rikrijojë imazhin e vet përmes një vale “reformash drastike”, që në thelb nuk synojnë ndërtimin e diçkaje të re, por kontrollin absolut mbi çdo bashki dhe çdo zë kritik.

Shkarkimet e menjëhershme të drejtuesve vendorë në Vlorë, Fier, Durrës e Tiranë, urdhrat për tokat e “xanuna” sipas tij, dhe gënjshtrat për faljen e gjobave nuk janë gjë tjetër veçse përpjekje për të zhdukur çdo aleancë të mëparshme e për të ngritur një besnikëri të re, të ndërtuar mbi frikë dhe bindje pa kushte. 

Por si mund të paraqitesh si reformator, kur vetë ke qenë arkitekti i sistemit që sot përpiqesh të shembësh?

Në këtë teatër pushteti, banorët e Thethit u përballën me fadromat pa urdhër gjykate. Ata që për vite ndërtuan me djersë një jetë të ndershme në mal, papritur u etiketuan si problem. Protesta e tyre nuk ishte revoltë kundër ligjit, por kundër hipokrizisë së atyre që për një dekadë i inkurajuan në heshtje, dhe sot, në emër të “rilindjes”, i shembin me zhurmë.

Migjeni, në “Një natë pa gjumë”, përshkruan padrejtësinë si një errësirë pa fund:

“Pak dritë o shok, o vëlla, të lutem pak dritë në këtë natë kur shpirti vuen,kur të dhemb e s’di ç’të dhemb,e syri gjumë nuk ka.”

Kjo është nata në të cilën ndodhet sot Shqipëria. Një vend ku ligji zbatohet sipas nevojës së pushtetit, dhe reforma është thjesht një tjetër armë për të shtypur qytetarin.

Kur një princ i vjetër përdor taktikt e princave të rinj, rezultati nuk është rigjallërim, por dekadencë. Shqipëria nuk ka nevojë për riciklimin e të njëjtit pushtet me një maskë të re, por për një kthesë të vërtetë. Dhe kjo nuk fillon me shkarkime të zgjedhura me dorë apo me ligje të njëanshme.

Fillon me largimin e Ramës dhe gjithë strukturës politike që për 12 vite ka ngritur një sistem abuziv, klientelist dhe të pashpresë. Atëherë çdo urdhër, çdo ligj e çdo fadromë do të mund të shndërrohej në mjet drejtësie, jo në armë të sundimit absolut.

Të fundit