Video/ Një vit para zgjedhjeve u dha titujt e pronësisë, pasi u mori votën Rama urdhëroi shembjet në Theth

Një vit më parë, saktsisht më 30 qershor 2024, kryeministri Edi Rama ndau me bujë mbi 200 tituj pronësie në Theth dhe zona të tjera veriore. Në sy të banorëve, ai premtoi faljen e gjobave për ndërtimet pa leje në shtëpitë ekzistuese, duke pranuar realitetin e vështirë të zonave alpine dhe nevojën për zhvillim turistik.

Ky akt u lexua si sinjal mbështetës për banorët që kishin ndërtuar pa leje por me qëllim për të përmirësuar jetesën, kryesisht duke investuar në bujtina për turizëm, kryesiht me kursimet e tyre dhe të ardhurat nga emigrantët. 

Deklaratat e kryeministrit në 2024 flisnin për mirëkuptim ndaj ndërtimeve nga nevoja, dhe si duket rezultopi të ishte thjeshtë një premtim parazgjedhor. 

" Ajo që ka rëndësi është që sot janë 200 tituj pronësie që janë këtu dhe një pjesë të vogël do ta shpërndajmë tani, pjesën tjetër gjatë ditës. Ndërkohë janë dhe 90 tituj të tjerë, për 40 Bashkia e Shkodrës do të duhet të bëjë një studim, çështjen e zonës, ndërsa për 50 titujt të tjerë është problematika në pronën e tyre.

Natyrisht që këtu do të gjejmë një zgjidhje, për të gjithë ata që janë në kushtet tuaja, por pamundësia për të marrë një leje lidhet me problematikat. E dyta, çështja e gjobave që është rezultat i ndërhyrjeve aty ku keni pasur shtëpinë e vjetër. Qeveria do t’i fali të gjitha këto gjoba, sepse e kemi diskutuar atë ditë dhe nuk janë ndërtime të bëra masivisht për t’iu shmangur ligjit, por janë ndërtime nga nevoja. Kjo nuk do të thotë që këto ndërtimet pa leje do të vijojnë", u shpreh Rama.

Sot, një vit pas shpërndarjes së titujve, dhe  disa javë pas zgjedhjeve, qeveria ka ndërmarrë një aksion të ashpër për shembjen e dhjetëra objekteve pa leje në Theth. Ky ndryshim kursi ka lënë banorët të zhgënjyer, të lënduar dhe të pasigurt për të ardhmen.

Sot, në terren, IKMT nuk duket se po bën dallim. Banorët që kanë ndërtuar bujtina për turistë, shumë prej tyre të vizituara edhe nga zyrtarët e lartë, po shohin pasuritë e tyre të rrënohen pa dialog publik.

Protesta, përplasje me policinë dhe bllokim rrugësh nuk janë veç shenjë zemërimi , por thirrje për transparencë, drejtësi dhe përmbushje të premtimeve publike.