KLSH "mollë sherri" në Kuvend, përplasja që solli raporti për drejtoreshën e 'Buxhetit'

Këshilli i Lartë i Shtetit (KLSH) është kthyer në “mollë sherri” mes mazhorancës dhe opozitës, në seancën e sotme plenare.

Grupi parlamentar i Partisë Demokratike kërkoi që KLSH të jetë prezentë dhe të raportojë nga Kuvendi, kërkesë e cila u kundërshtua fort nga deputetët socialistë.

Ishte kreu i grupit të PD, Gazment Bardhi i cili deklaroi se PS po tenton të intimidojë KLSH-në duke i cenuar haptazi pavarësinë si institucioni që ka denoncuar një serë aferash.

“Të martën në Komisionin e Ekonomisë, KLSH është vënë para një situate të pandodhur në 34 vite. Është tentuar të ballafaqohet një nëpunëse publike me kryetarin e KLSH. Cenim i hapur i pavarësisë së institucionit. Ka qenë KLSH që ka denoncuar aferën e Inceneratorëve apo skandalin Onkologjikut apo shkeljet me procedurat e tenderimit në Ministrinë e Brendshme. Draft-rezoluta është lexuar nga relatorja e komisionit. KLSH brenda këtij sesioni do duhet të ftohet për të raportuar në seancë plenare”, deklaroi Bardhi.

Mirëpo, kjo deklaratë e Bardhi u kundërshtua fort, nga kreu i Komisionit të Financave dhe Ekonomisë Eduard Shalsi i cili pretendoi se nuk janë sqaruar motivet se pse KLSH kërkon shkarkimin nga detyra të Mimoza Dhëmbit, drejtoreshës së ‘Buxhetit’.

“Të paaftë për t’u ballafaquar me argumenta, të paktën të merren vesh mirë me njëri-tjetrin sepse do kishin kuptuar që këtë vit në Komisionin e Ekonomisë dhe Financave ka qenë një zonjë që ka ndërruar 16 ministra dhe sot ushtron një funksion për të cilin KLSH ka kërkuar shkarkim nga detyra. Është precedent i ri për komisionin, atëherë i kërkuam kryetarit të KLSH që të sqaronte motivet që e kanë çuar një masë të tillë ekstreme për një punonjëse për të cilën i gjithë grupi i PD on block ishte i shqetësuar”, tha Shalsi.

Shalsi shkoi më tej duke akuzuar KLSH-në se nuk ka dhënë përgjigje për shumë çështje, çka sipas socialistit, e bën të pamundur raportimin e KLSH në Kuvend.

“E dyta, ka disa pyetje që janë ende pa përgjigjie nga KLSH, përshembull skandali i Onkologjikut ka pasur kallëzim penal apo jo, ende sot nuk kemi një përgjigjie. Komisioni i ka bërë një sërë pyetjesh të tjera. Po ua përsëris, nuk ka nevojë KLSH për avokatinë tuaj. Ne jemi ende me diskutimin e draft-rezolutës, jemi në pritje të disa përgjigjeve që nuk janë kthyer dhe në ditën që do i kemi, do ia sugjerojmë parlamentit”, shtoi Shalsi.

Debati tek ‘Ekonomia’

Tre ditë më parë në mbledhjen e Komisionit të Ekonomisë, Arben Shehu kreu i KLSH, teksa prezantoi raportin përfundimtar të auditimit në Ministrinë e Financave dhe të Ekonomisë, kërkoi shkarkimin e drejtoreshës së ‘Buxhetit’, Mimoza Dhëmbi.

Sipas KLSH-së Dhëmbi ka bërë keq klasifikim investimesh, probleme me fondet për rindërtimin, ka shkelje me ndarjen e buxheteve, mungesë monitorimi për detyrimet e prapambetura pasi nuk raportoi vlerën e saktë.

Por, kjo kërkesë nxiti debat me Eduart Shalsi i cili për herë të parë në një komision, ftoi për ballafaqim një nëpunëse publike, Mimoza Dhëmbin.

Debati:

Arben Shehu: Kjo situatë nuk ka lidhje me detyrimin tonë për të raportuar për këtë çështje. Është një precedent i pabazë ligjërisht për të thirrur të gjithë punonjësit e administratës për pretendimet e tyre. 

Eduard Shalsi: Ku bazoheni që nuk thoni që është i bazuar ligjërisht.

Arben Shehu: Ne kemi detyrim raportimin vjetor, jo çështje të tjera.

Eduard Shalsi: Eshtë i vërtet që nuk është i ndodhur ky precedent, por në dijeninë time KLSH kurrë nuk ka bërë një raport të tillë.

Arben Shehu: Jemi të vlerësimit, që kjo nuk është pjesë e detyrimit për të raportuar. Kërkoj të rishikoni vendimin tuaj, kjo do ti shërbej edhe ecjes përpara në bashkëpunimin institucional, për të përmirësuar ecurinë e punës. 

Eduard Shalsi: Ajo nuk do të vendoset në siklet. Mos u shqetësoni se është me eksperiencë. Sot ke një status tjetër, nuk do ta dëshironim këtë. Por ne këtej na ka shqetësuar ky paragraf.  Një Cv të karrierës tënde.

Mimoza Dhëmbi: Kam filluar punë që në 92’, dhe kam ndërruar 15-16 ministra, duke nisur nga Genc Ruli dhe përfunduar sot.

Eduard Shalsi: Keni pasur raste të tjera ku janë marrë masa përballë jush.

Mimoza Dhëmbi: Po është hera e parë, me KLSH-në kemi pasur bashkëpunim dhe ballafaqim deri në produktin final. 

Eduard Shalsi: Si jeni ndjerë, jeni njohur paraprakisht për këtë raportin e KLSH?

Mimoza Dhëmbi: Ka qenë surprizë, për ne, kemi marrë raportin paraprak, dhe ishim të bindur që raporti vjetor s’do kishte surpriza. Ndërkohë që ishim në pritje të ballafaqimi këtë vit ai nuk u bë. Flasim për tetorin e 2023-shit, kur u bë buxheti faktik i 2022.

Gjetjet e KLSH për Mimoza Dhëmbin

RAPORT PËRFUNDIMTAR AUDITIMI NË MINISTRINË E FINANCAVE DHE EKONOMISË “AUDITIM I PËRPUTHSHMËRISË (tetor 2023)

-“Largim nga shërbimi civil” neni 57, pika 2 dhe neni 58 germa (ç) e ligjit nr. 153/2013 “Për nëpunësin civil”, i ndryshuar:

1. Për znj. M. DH., (Mimoza Dhembi) me detyrë Drejtor i Drejtorisë së Përgjithshme të Buxhetit:

- Për problematikat në drejtim të mos respektimit të disiplinës fiskale, konstatuar kjo në të gjitha fazat e planifikimit, ekzekutimit dhe raportimit të buxhetit, në kundërshtim me kërkesat e LOB-it, që konsistojnë në: rialokime për projektet e investimeve me financim të brendshëm pa respektuar radhën prioritare në buxhetim, keqklasifikimin e investimeve, krijimin e kushteve për marrjen e angazhimeve pa fonde buxhetore, problematika në lidhje me procesin 398 e detajimit të fondeve për rindërtimin, detajimin e projekteve të investimeve publike me akt normativ pa kaluar në PBA, shkurtimin e fondeve të investimit në momentin e lidhjes së kontratës dhe rialokimin e këtyre fondeve drejt projekteve me detyrime të prapambetura, mungesën e monitorimit të stokut të detyrimeve të prapambetura, pasi nuk raportohet në vlerën e saktë dhe mbetet jashtë treguesve të konsoliduar fiskalë, gjenerimi i penaliteteve nga mos ekzekutimi në kohë i vendimeve të GJEDNJ; për përdorimin e fondit rezervë për rastet që duhet të përfshihen në ciklin normal të shpenzimeve referuar kriterit të parashikueshmërisë dhe dhënien e mendimit të MFE në kushtet e mungesës së dokumentacionit shoqërues të projekt akteve, duke ekspozuar cënueshmërinë e vendimmarrjes së Këshillit të Ministrave; rishikimeve buxhetore përtej afateve të përcaktuara në kuadrin rregullator në fuqi dhe pas periudhave kur është mbyllur raportimi i treguesve fiskalë faktikë.