“Ai djali që vjen me varkë është si Dua Lipa”, pse nuk qëndron krahasimi i Ramës për emigrantët në Londër

Vizita e kryeministrit Edi Rama në Londër një ditë më parë në Doëning Street 10, u zhvillua në sfondin e polemikave që prej muajsh vijojnë në Britaninë e Madhe mbi çështjen e imigrantëve që kalojnë ngushticën e La Manshit për të hyrë ilegalisht në Britani. 

Gjatë takimit me kryeministrin britanik Rishi Sunak është shprehur se ata që kalojnë kanalin e La Manshit me gomone janë njësoj si këngëtarja e famshme Dua Lipa që shkoi si emigrante në Britani dhe tani punon e këndon.

“Ashtu siç djali që vjen me një varkë nuk është thjeshtë një shqiptar, por pjesë e një tabloje më të gjerë, po kështu Dua Lipa nuk është thjeshtë një këngëtare britanike, por një emigrante shqiptare që ka ardhur këtu si shumë të tjerë që kanë ardhur të ndërtojnë, të kujdesen, të gatuajnë dhe të këndojnë për ju dhe duam të sigurohemi që ky komunitet të ndihet jo vetëm i sigurt, por edhe i nderuar këtu”, tha Rama.

Ndryshimi

Në fakt, duke dashur të krijojë një paralelizëm, Rama harron se largimi i këngëtares shqiptrare me famë botërore Dua Lipa në krahasim me shqiptarët e viteve të fundit janë dy realitete krejt të ndryshme.

Kujtojmë se vetë Dua ka deklaruar se familja dhe populli i saj janë dëbuar me dhunë nga Kosova nga regjimi serb. “Serbët na kanë dëbuar nga Kosova. Kemi qenë viktima të terrorit të tmerrshëm”, ka thënë ajo në një nga intervistat e saj.

Dua ka lindur në Londër në vitin 1995.  Kur ishte 11 vjeç, familja e saj vendosi të rikthehej në Kosovë, por pesë vjet më vonë ajo paketoi valixhet dhe u rikthye sërish në Londër.

Nga ana tjetër, shqiptarët, kryesisht të rinjtë vënë jetën e tyre në rrezik dhe lënë gjithçka në Shqipëri për një jetë më të mirë, të sigurojnë të ardhurat që në Shqipëri nuk mund t’i kenë.

Largimi i shqiptarëve të shumtë nga vendi për shkak të pamundësive ekonomike dhe hapësirave për të siguruar një jetesë më të mirë, është po ashtu një temë debate dhe në Shqipëri. Qeveria është gjendur nën akuza të përsëritura se është përgjegjëse për situatën e krijuar, veçanërisht për ikjet e të rinjve.

Shifrat

Sipas anketës kombëtare të emigracionit në familje, për vitet 2011-2019, të realizuar nga INSTAT dhe disa organizata ndërkombëtare rreth 50% e afro 177 mijë qytetarëve të larguar, janë të rinj të moshës 15-29 vjeç. Sipas studiuesve të fushës, arsyet kryesore lidhen me varfërinë, mungesën e punësimit dhe të zhvillimit në karierë.

Po ashtu, edhe mediat britanike i kanë kushtojnë vazhdimisht reportazhe shqiptarëve që ikin masivisht drejt Britanisë së Madhe.

Ndër shkaqet që përmendën për këtë eksod, renditen fenomene si korrupsioni, pagat e ulëta, kushtet e këqija të punës dhe cilësinë e ulët të jetesës.

Kryeministri Rama nga ana e tij është mbrojtur duke argumentuar se kjo është një tendencë e përgjithshme që ka prekur shumë vende.