Mbyllja e Tik Tok: zgjidhje për shoqërinë apo hall fushate?

Qeveria e shpalli Tik Tok-un armik të shoqërisë, e sidomos të fëmijëve, duke ia adresuar fajin e dështimit të sigurisë në shkolla, pikërisht platformës sociale.

Padyshim, rrjetet sociale shpesh kthehen në shkak për dhunë, sherre e konflikte mes adoleshentësh dhe jo vetëm. Por, mbyllja e Tik Tok nuk e largon dot njollën e turpit të një ministreje që shkrihej gazit teksa opozita i kërkonte sqarim për vrasjen e 14-vjeçarit Martin Cani, pranë shkollës 9-vjeçare “Fan Noli” në Tiranë.

Shfajësimi me mbylljen e Tik Tok

Rama dhe Manastirliu njoftuan vendimin për ta mbyllur Tik Tok-un për një vit. Kryeministri u shpreh se ndjehej i lehtësuar për mbylljen e Tik Tok, por duke harruar se sot fëmijët qarkullojnë në shkolla e në rrugë me mjete prerëse, thika, madje edhe me armë.

Megjithatë, duket sikur qeveria e ka parë mbylljen e platformës sociale si shfajësim për të treguar se kjo masë do t’i japë fund sherreve, konflikteve, bullizmit tek adoleshentët.

“Unë sot ndihem i lehtësuar që në një periudhë të shkurtër, pas një diskutimi të gjerë dhe gjithëpërfshirës me të gjithë faktorët që janë drejtpërdrejtë që janë të lidhur me këtë sferë të edukimit dhe sigurisë të fëmijëve tanë, kemi një produkt konkret, me masa konkrete dhe kemi sigurinë që duke zbatuar këtë plan do të kemi një sistem arsimor më të mirë dhe më të sigurt”, u shpreh Rama.

Është shumë më i fortë, shumë më ndikues, shumë më tërheqës ai rrugaçi i lagjes që quhet TikTok.

Ne TikTok-un do e mbyllim për një vit. Kini parasysh që ne kemi bërë të gjithë hulumtimet tona në aspektin teknologjik dhe do të na duhen 6-8 javë nga fillimi i vitit të ardhshëm dhe për një vit do e mbyllim TikTok-un. TikTok nuk do ketë në Republikën e Shqipërisë. Do shohim se si do funksionojnë qeveritë e tjera, si do reagojë vetë TikTok-u”, u shpreh Rama.

Por, sa e zgjidh Tik Tok situatën alarmante me adoleshentët? Platforma sociale shpesh kthehet në rrezik për sherre e konflikte ose sfida të cilat rrezikojnë jetën e fëmijëve. Megjithatë, më alarmante është fakti se sot një pjesë e fëmijëve lëvizin lirisht në ambientet e brendshme të shkollave me thika e në një rast, edhe me armë zjarri.

Në rrjet kanë qarkulluar shumë video ku fëmijët të pa frikësuar, reklamojnë thika në shkolla dhe më pas në rrjete sociale. Deri tani, nuk është njoftuar asnjë masë e marrë nga qeveria për t’i dhënë fund ‘rrugaçërisë’ që në fakt, nxënësit e shohin çdo ditë nëpër shkolla.

Avokatia ndaj Manastirliut

Vrasja e Martin Canit ngjalli reagimin e të gjithë qytetarëve dhe opinionit publik të cilët njëzëri kërkuan dorëheqjen e ministres së Arsimit, Ogerta Manastirliu. Por, ministrja për të shpëtuar karrigen e saj, ia adresoi fajin për ngjarjen e rëndë Tik Tok-ut.

Megjithatë, thirrja e prindërve të një 14-vjeçari të vrarë pranë shkollës, dhe qindra prindërve të tjerë, erdhi e shurdhër tek Rama, i cili shprehu mbështetje për Manastirliu në atë që kryeministri e quajti “transformim të arsimit” .

“Duke thënë të gjitha këto dua të shpreh publikisht këto si përgjigje për ata që donin të nxirrnin përfitime absurde nga tragjedia e një familje dhe nga humbja e një jete, duke drejtuar gishtin për gjithfarë akuzash dhe duke kërkuar përgjegjësi personale nga ministrja e arsimit, e cila ka jo vetëm të gjithë mbështetjen time, por kam bindjen se ashtu si kundër që ka luajtur një rol të rëndësishëm dhe pamohueshëm në transferimin e sistemit tonë shëndetësorë, por dhe një rol të pamohueshëm për transformimin e arsimit tonë, për ta bërë më të mirë”, u shpreh Rama.

Por, për çfarë transformimi flet kryeministri? Për atë transformim që po i kthen fëmijët dhe adoleshentët në “trimat” e shkollës? Për atë transformim që po i lejon të bredhin lirisht me thika në duar? Apo për transformimin që po iu mohon shkollimin e po i çon drejt qendrave të riedukimit?

Fakte të tilla kryeministri nuk i përmend edhe pse janë të pamohueshme, kostot e të cilave shoqëria po i paguan.

“Akt i pastër elektoral”

Vendimi për mbylljen e Tik Tok vjen disa muaj para zgjedhjeve parlamentare të 2025-ës.

Për deputeten demokrate Ina Zhupa lëvizja e fundit e Ramës është një akt i pastër elektoral, pasi dështoi tentativa për të kontrolluar platformën. Demokratja shkruan në Facebook se Rama i trembet interkativitetit të Tik Tok në prag të zgjedhjeve, duke ia adresuar platformës dështimin në arsim.

“Të shfrytëzosh vrasjen e një 14 vjecari për të zgjidhur hallet personale me rrjetet sociale që nuk kontrollon dot, është vrasje e dyfishtë dhe akt i rëndë ndaj lirisë. Rama sot lajmëroi se arsimi i dështuar qënka faj i Tik Tokut, se thikat në shkolla i fuska Tik Toku, se drogën në shkolla e coka Tik Toku, se mësimin me dy turne e bën Tik Toku, se mungesën e rezultateve në testin Pisa e manipulon Tik Toku, se mungesën e aktiviteteve në shkolla e ka faj Tik Toku, se ministren e dështuar ja vuri Tik Toku, se paratë e arsimiti vidhka Tik Toku. Edhe pasi gjeti “fajtorin” do e mbyll atë për 1 vit.

Vendimi diktatorial për mbylljen e një rrjeti social si Tik Toku që nuk po e kontrollonte dot është akt i rëndë kundër lirisë së shprehjes dhe demokracisë. Është akt elektoral i pastër dhe përdorim i pushtetit për të shtypur liritë”, shkruan Zhupa në Facebook.