Donte ta fejonte pa dëshirë, 19-vjeçarja në Durrës vret babanë dhe e varros në oborrin e banesës

Një ngjarje e rëndë ka ndodhur në qytetin e Durrësit. Pëllumb Meta, 50 vjeç, ishte shpallur i zhdukur prej 10 ditësh nga familjarët. Denoncimi është bërë nga djali i tij.

Por, pas kërkimeve policia zbuloi ngjarjen dhe 50-vjeçari u gjet i varrosur në oborrin e banesës së tij. Vajza e tij 19-vjeçare, H. M., e ka vrarë babain me armë zjarri dhe më pas trupin e tij e ka varrosur në oborr.

Vajza ka deklaruar se motivi që e ka shtyrë për ta vrarë babain është fakti se ai donte ta fejonte pa dëshirën e saj, si edhe konfliktet në familje.

Ndërkohë, po bëhet ekspertiza e trupit të 50-vjeçarit, ndërsa 19-vjeçarja është arrestuar.

“Më datë 13.02.2024, rreth orës 22:30, shtetasi H. M., 25 vjeç, banues në fshatin Shënavlash Durrës, ka kallëzuar në Polici se ishte larguar nga banesa, babai i tij, shtetasi P. M., 50 vjeç, banues në Shënavlash, Durrës, dhe se kishin humbur kontaktet me të.    

Pas këtij kallëzimi, shërbimet e Policisë kanë nisur menjëherë kërkimet dhe më datë 17.02.2024, bënë të mundur gjetjen e automjetit të shtetasit P. M., të parkuar në aksin rrugor Shënavlash-Sektor Rinia.  

Grupi i posaçëm hetimor i ngritur për këtë rast, në drejtimin e Prokurorisë, vijoi hetimet dhe kërkimet, pasi dyshohej se 50-vjeçari ishte zhdukur.

Si rezultat i hetimeve të thelluara u bë e mundur zbardhja e zhdukjes së shtetasit P. M. Nga provat e siguruara dyshohet se ky shtetas nuk ishte zhdukur, por ishte vrarë në banesë. 

Gjithashtu, nga hetimet dyshohet se autore e vrasjes së 50-vjeçarit është vajza e tij, shtetasja H. M., 19 vjeçe, e cila është arrestuar për veprën penale "Vrasja për shkak të marrëdhënieve familjare”. 

Shtetasja H. M. ka deklaruar se motivi i vrasjes ka qenë nxitja prej babait, për t’u fejuar pa dëshirën e saj, si dhe konfliktet familjare që kanë patur.   

Grupi i posaçëm hetimor po vijon hetimet e thelluara për të identifikuar dhe vënë përpara përgjegjësisë ligjore, shtetas të tjerë të implikuar në këtë ngjarje. Trupi i shtetasit P. M. është zhvarrosur dhe është transportuar në Institutin e Mjekësisë Ligjore, për kryerjen e ekspertizës së mëtejshme.   

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme”, thuhet në njoftim.