Flash News
Shoferja humb kontrollin në aksin Devoll-Miras, dy të plagosur
SPAK sekuestron pasuritë e dy ortakëve të Evis Berberit
Goro në burg, Blerina Balaj komandohet kryetare e Bashkisë Himarë
Video/ Tensione në mbledhjen e Këshillit Bashkiak të Himarës, qytetari pështyn në fytyrë Vangjel Tavon
Olsi, ashtu si Edi, qenka burrë p….
Intervista e Albin Kurtit para 10 vitesh kur i mbyllnin dyert në Tiranë e Prishtinë, premtimi për bashkimin Shqipëri-Kosovë; rezervat për flamurin
Sot, Albin Kurti i Vetëvendosjes është shpallur si fitues i zgjedhjeve të parakohshme parlamentare në Kosovë.
Në nisje të karrierës së tij politike janë arkivuar intervistat, në kohën kur në Tiranë gati-gati ishte shpallur i padëshirueshëm.
Gazetari Roland Qafoku ka risjellë intervistën e para 10 viteve në Ora News, drejtor informacioni në atë kohë, kur sipas tij i mbyllnin dyert në Tiranë e Prishtinë.
“Albini sapo kishte dalë nga burgu në Beograd, kishte themeluar lëvizjen “Vetëvendosja”, kishte shkurtuar flokët dhe ngjante shumë me një hero që udhëhiqte një revolucion. Ishte plot energji dhe gjuha e tij vërtetë ishte e tejkaluar për kohën, por ishte e qartë dhe e bazuar në parimin Willsonian të vetëvendosjes dhe bashkimit të trojeve shqiptare. Intervista bëri shumë bujë dhe fraza e tij se Kosova duhet të bashkohet me Shqipërinë e thënë këtë në mes të Tiranës kishte efektin e nisjes së rakete”, kujton Qafoku.
Lexoni intervistën e plotë në vitin 2009:
Zoti Kurti, cili është thelbi i lëvizjes suaj “Vetëvendosja”?
Aspekti i papranueshëm i shtett të ri të Kosovës është që nuk na lejohet bashkimi me Shqipërinë. Neni 1.3 I kushtetutës i republikës së Kosovës na e pengon një gjë të tillë. Ne duam të kemi pavarësi të plotë që nëkupton pavarësi me sovranitet. E drejta për tu bashkuar me Shqipërinë do të ishte dëshmi që pavarësia jonë është e plotë. Është çështje tjetër a do të shfrytëzohej ajo e drejtë. Por ne aktualisht nuk na lejohet një gjë e tillë.
Nëse një ditë do ishit ju kryeministër çfarë do bëje?
Ne nuk jemi kundër pranisë ndërkombëtare por ne jemi kundër sundimit ndërkombëtar.
Dhe çfarë do bënit ju si kryeministër?
UNMIK dhe EULEKS do t’u ndërpritet bashkëpunimi përderisa nuk hiqen fuqitë ekzekutive të tyre. Pra, të na ndihmojnë të na këshillojnë, të na sugjerojnë por jo të sundojnë përmes fuqive ekzekutive. E dyta, të mos lejohej që Serbia të blejë pronat e shqiptarëve. Si qeveri do të duhet ti blejmë ne pronat e shqiptarëve nëse ata detyrohen ti shesin. Madje të dërgojmë policinë atje. Madje familjeve shqiptare që janë 500, t’ua punësojmë nga një anëtar në policinë e Kosovës dhe automatikisht do kishim 500 njerëz të armatosur që janë në gjendje të mbrojnë veten përkundruall Serbisë që i sulmon për çdo ditë. Dhe sidomos të integrohemi sa më shumë me Shqipërinë në aspektin politik, ekonomik, shoqëror, kulturor arsimor, e kështu me radhë. Për shkak se ne jemi një komb dhe kështu të ndarë nuk po mund të funksionojmë siç duhet. Rrudhja e trevave shqiptare po vazhdon edhe sot e kësaj dite edhe pse vazhdojmë të jemi të ndarë. Vetëm në një shekull kemi humbur gjysmën e territorit që popullojmë. 4 vilajetet shqiptare para 100 vjetëve kanë patur 92 mijë kilometra katrorë. Sot Shqipëria, Kosova, Maqedonia Perëndimore, Lugina e Preshevës që janë në Mal të zi janë rreth 46 mijë kilometra katrorë.
Cili është mendimi juaj për atë që po bën kryeministri Berisha për çështjen kombëtare?
Berisha ka bërë disa hapa pozitivë në aspektin e bashkimit kombëtar. Të paktën në nivelin deklarativ.
Si e pritët deklaratën e kryeministrit Berisha në 100 vjetorin e pavarësisë për heqjen e kufijve?
Ishte shumë e mirë por që shpresoj të pasohet me vepra.
A ka vepër më të madhe se sa rruga Durrës-Kukës-Morinë?
Kjo është shumë mirë por do ishte mirë që në rrugën Durrës-Prishtinë duhet të lëviznin më shumë maune të Shqipërisë dhe Kosovës se sa të Serbisë dhe Greqisë. Dmth rruga po, por kush do ta shfrytëzojë atë rrugë? Rrjeti I organizatave tona duhet të pasohet me ligje që e lehtësojnë bashkimin tonë.
Unë jam I bindur që nëse do të organizoheshin dy referendume në Kosovë dhe Shqipëri për bashkimin kombëtar populli do ti thoshte po. Politikanët duhet të ndjekin popullin dhe jo e kundërta.
Jeni politikani i parë që kërkoni bashkimin e Shqipërisë me Kosovën. Kur mund të ndodhë kjo? A mund të jepni një parashikim?
Nuk mund ta parashikoj sepse mendoj se kjo varet prej nesh. Nuk do ishte mirë të bëja parashikime se njerëzit presin dhe demoralizohen më pas. Por unë mendoj se nëse punojmë kjo mund të arrihet në pak vite. Gjithsesi ky bashkim nuk duhet të kufizohet në bashkimin e Shqipërisë me Kosovën. Por edhe shqiptarëve të tjerë që janë shumicë dërrmuese në trojet e tyre autoktone. Por ne mund të bëjmë hapa të vegjël për këtë qëllim të madh. Për shembull tu jepet nënshtetësia shqiptarëve jashtë Shqipërisë. Kjo do të thoshte që Sali Berisha, Edi Rama, Ilir Meta të bëjnë fushatë në Kosovë, Maqedoni dhe gjetkë. Psh Kroacia u ka dhënë dy shtetësi kroatëve në Bosnje dhe nuk ka patur problem në BE për këtë gjë. Por duhet më shumë vullnet.
Kosova ka një flamur që nuk është i kombit. Kur ju hyni në një zyrë, shikoni atë flamur për të cilin ju nuk keni lutuar. Gjaku i kosovarëve është derdhur për flamurin kuq e zi. Si e bëni betimin ju por edhe dikush që është ushtarak, ai që është polic,një zyrtar e deri te presidenti? Duhet thënë se ai flamur duket shumë i lehtë përballë flamurit kombëtar kuq e zi. Si ju duket juve personalisht?
Unë kam një problem se si e bëjnë ata betimin. Për më tepër që himni i Kosovës quhet Evropa dhe nuk ka tekst. Sepse teksti duhet të ishte në shqip dhe Kosovën ata e parashikojnë si multietnike. Unë jam kundër këtij flamuri. Ai nuk ma ngroh zemrën. Është flamur i kaltër, i ftohtë, Ato yjet e bardha të krijojnë përshtypjen se ai është flamur i NATO-s. Ne shqiptarët kemi një yll prej 6 yjeve që janë në flamur. Pesë të tjerët janë të komuniteteve të tjera që po të mblidhen bashkë bëjnë 6 apo 7 për qind. Por ajo që më brengos më shumë është harta e Kosovës në flamur. Kjo ka për qëllim të mos ndryshojë më por përfytyrimi që ai ka për veten. Kur njerëzit e shikojnë flamurin e Kosovës krijojnë një përfytyrim të rrudhur për veten. Harta shënjon një lloj kufizimi, një lloj ndrydhje. Për mua kjo është një problematikë e madhe.