Koronavirusi në Shqipëri, Basha flet si kryeministër: Nuk është koha për panik, ekspertët tanë do jenë në shërbim të qytetarëve

Kreu i Partisë Demokratike, Lulzim Basha ka dalë sot në një deklaratë për mediat së bashku me disa zyrtarë të PD, pas evidentimit të dy rasteve të para me koronavirus në Shqipëri.

Në fjalën e tij Basha theksoi se PD ka mbledhur grupin e profesionistëve për të përballuar sa më mirë situatën me koronavirusin në vend.
Ndër të tjera ai u bëri thirrje qytetarëve që të dëgjojnë këshillat e mjekëve lidhur me higjenën personale.
Po ashtu ju bëri thirrje mjekëve për të zbatuar me përpikmëri rregullat dhe shërbimin për qytetarët.
“Sot u konfirmuan edhe zyrtarisht dy rastet e para të të prekurve nga koronavirusi. Duke u uruar atyre shërim sa më të shpejtë, dua t’ju drejtohem me këtë mesazh.
Së pari, personelit shëndetësor, të nderuar mjekë dhe infermierë.
Shëndeti i shqiptarëve është në duart tuaja. Sytë, veshët dhe mendjet e njerëzve, si asnjëherë, janë të fokusuara te ju.
Prandaj, sot të gjithë jemi në mbështetjen tuaj për të zbatuar masat dhe vendimet që ju sugjeroni dhe vendosni.
Ne kemi një nga stafet më të specializuara mjekësore për të përballuar çdo situatë dhe ajo që duhet t’u japim juve sot, janë mjetet dhe fondet e nevojshme mjekësore për ta përballuar këtë gjendje me sukses.
Ekspertët tanë do jenë në shërbim të qytetarëve për të ndjekur nga afër situatën.

Të dashur bashkëqytetarë!
Sot duhet të jemi të ndërgjegjshëm dhe të përgjegjshëm për çdo veprim që ndërmarrim.
Të dëgjojmë me vëmendje këshillat e mjekëve dhe t’i zbatojmë ato.
Të gjithë ju që vini nga Italia e Veriut, por edhe zona të tjera të prekura nga coronavirusi, drejtohuni për ekzaminime, nëse keni simptoma gripi dhe shmangni kontaktet me qytetarët dhe të afërmit për një periudhë 2 javore. Kujdes të veçantë duhet të kemi për të moshuarit.
Sot nuk është koha për panik, por për kujdes maksimal.
Sa më të kujdesshëm të jemi sot, aq më lehtë do ta kalojmë këtë situatë dhe me pasoja minimale.
Ne do të jemi në ndjekje të situatës hap pas hapi. Ekspertët dhe specialistët tanë të shëndetësisë do të jenë në shërbimin e çdo qytetari për çdo informacion shtesë që do të kenë”, tha Basha.
Më tej lideri demokrat kujtoi tre masat për të cilat i bëri thirrje qeverisë lidhur me situatën, për të cilat tha se duhen vënë sa më parë në zbatim.
Dy javë më parë, nga kjo foltore i kam bërë thirrje qeverisë të marrë masa për t’u përgatitur për përballimin e situatës.
1. Fondet e mjaftueshme
2. Mobilizimi maksimal
3. Transparenca
Këto janë tre komponentë të rëndësishëm politikë, për të cilët nuk duhet humbur kohë”, shtoi Basha.