Flash News

Berisha: Kërkova hetim ndërkombëtar për 21 Janarin, por Ina Rama refuzoi, përgjegjësinë e ka Rama

Abuzimi me tenderin e rrugës Kardhiq-Delvinë, SPAK kërkon një vit burg Sonila Qaton

Parandalohet një ngjarje kriminale në Durrës, arrestohen tre persona me armë dhe automjete të blinduara

Përfshihet nga flakët qendra tregtare në Vorë

Aksident tragjik në Itali, humbin jetën dy të rinj, mes tyre një shqiptar

OP-ED

Trashëgimtari

Politiko 16 Korrik 2024, 11:24

Alfred Lela

Përzgjedhja e JD Vance si kandidat për zv. President dhe, me shumë gjasë, në janar 2025 zyrtarisht edhe nr. 2 i Shtëpisë së Bardhë do të shenjojë jo vetëm të sotmen e Partisë Republikane, por edhe të ardhmen. Zgjedhja është krejt atipike, siç në fakt janë thuajse të gjitha aktet e Trump, por 39-vjeçari nga Ohio nuk është një zgjedhje për të habitur apo skandalizuar por, me sa duket, për të themeluar një Parti Republikane të re e cila do të shenjohet nga Trump legacy.

Merr së pari moshën e JD Vance. Në prag të të dyzetave ai do të jetë një prej 2 zv. presidentëve më të rinj në historinë e Amerikës, dhe me gjasë edhe një prej presidentëve më të rinj. Ai ka gjysëmn e moshës së bosit të tij Trump, ndërkohë që ka të përbashkët me të retorikën politike atë që është etiketuar si nationalist conservatism.

Me anë të Vance Trump ka shmangur edhe një klishe të politikës amerikane dhe botërore, nevojën që çdo burri t’i bashkangjitet një grua në postet e fuqisë së lartë, njëfarë affirmative action gjinor.

Duke piketuar senatorin e ri nga Ohio, Trump, një nju jorkez tipik dhe përfaqësues i elitave të bregut Lindor amerikan, ka ofruar Main Street (popullin) me Wall Street (elitat). Edhe vetë prejardhja e Vance është krejt modeste, nga një familje e varfër dhe me probleme sociale. Trump ka zgjedhur kështu të mos i përfaqësojë vetëm me retorikë, por edhe drejtpërdrejt ata që ai vetë i cilëson si të përjashtuarit apo të lënët pas.

Çka e bën edhe më atipike figurën e kandidatit për zv. President është fakti i të qenit shkrimtar. Për të qenë të saktë, çdo kandidat për President në Amerikë dhe thuajse çdo senator apo figurë e lartë i shton ngjitjes së vet në politikë një libër-por janë kryesisht tekste të shkruara nga ghost writers. Në rastin e JD Vance ai është autori; dhe jo vetëm kaq, por me një bestseller të kthyer në film nga një prej regjisorëve më të njohur të Hollivudit, Ron Howard.

Gjithaq atipik është fakti se Vance lundron në kah të kundërt edhe sa i takon fesë. Nga protestant, që është denominacioni zotërues i krishterë në Amerikë, ai është konvertuar në katolik roman.

Të gjitha këto përbëjnë siluetën politike të JD Vance, por qendrore në përzgjedhjen e tij mbetet fakti se ai është shënjestuar si trashëgimtar nga Donald Trump. Partia Republikane, e mbiquajtura GOP-Grand Old Party- kur, siç parashikonin të majtët dhe frikësoheshin të djathtët, pritet të shkërmoqej nën ciklonin Trump, po rinohet dhe rinovohet.

Trump ka bërë një zgjedhje të shkëlqyer, në dukje.

Tani i mbetet historisë ta përgënjeshtrojë ose certifikojë.