KRYESORE

Opera me PPP? Flasin artistët Ylber Gjini dhe Aleksandër Peçi: Pasi ministrja e tha me zë e figurë, ne të “keqkuptuarve” tani na ofendon

Opera me PPP? Flasin artistët Ylber Gjini dhe Aleksandër Peçi:

Një deklaratë e ministres së Kulturës, Elva Margariti se Teatri Kombëtar i Operës dhe Baletit i sapo rikonstruktuar të shkëputet nga varësia e shtetit ka ngjallur reagime të ashpra në radhët e artistëve.

Baritoni i njohur, Ylber Gjini duke folur për Politiko.al thotë se teatri nuk mund të kalojë dot me koncesion, ndërsa  e krahason rastin në fjalë me uzinën e Ballshit.

Ai insiston që ministria duhet të marrë shembull një ligj nga teatrot evropiane dhe ta përshtasë, pasi sipas tij sot mungon ende statusi i artistit, ligji për artin dhe reforma e pensionit.

Ju ishit në mbledhjen e organizuar nga ministria e Kulturës, kur u prezantua edhe bilanci 4-vjeçar i operës dhe baletit, kur ministrja Elva Margariti propozoi se Teatri Kombëtar i Operës dhe Baletit i sapo rikonstruktuar të shkëputet nga varësia e shtetit. Çfarë ndodhi atë ditë?

Unë isha prezent në mbledhje me artistët. Ajo e tha në fund këtë propozim me zë dhe figurë dhe nuk pyeti nëse kishim ndonjë paqartësi sepse ishte bilanci i 4-vjecarit të operës. Ndërkohë, më pas ne na nxori sikur nuk e kuptuam se çfarë tha.  

Më pas me reagimin e saj, pra nga ministria, nuk e di se ku e kanë bërë këtë shkollë, ajo është shumë e vogël që të na tregojë ne se ku i kemi arat. Kështu që nuk e shpjegonte fare, por në një farë mënyre na ofendoi ne të “keqkuptuarit”, por u keqkuptuam se kur më gënjen 5 herë, edhe për herë të 6 nuk të besoj se ka thënë të vërtetën.

Ish-ministrja Kumbaro që në fillim fare na tha se do bëhet statusi i artistit, ligji për artin dhe reforma e pensionit. U bë gjë?

Me koncesion teatrin nuk e kalojnë dot se ka status kombëtar.                

U bë edhe uzina e Ballshit, kur e kishte shteti punëtorët merrnin pagën, pasi ia dhanë privatit ku i ke punëtorët e Ballshit sot? Ata s’morën rrogat, privati doli me humbje e shteti s’mori asnjë taksë.

Pas kundërshtimit të artistëve, Ministria e Kulturës reagoi në një deklaratë për mediat. Si e lexuat ju këtë reagim?

Ishte një gjysmë tërheqjeje. S’e di nga kanë lindur kaq të zgjuar ata që e sjellin rrotull e rrotull dhe në fund nuk thonë asgjë. Mund të sqarohej me dy fjali ai keqinformimi ynë.

Si duhet të funksionojë për ju TKOB?

Të marrin ligjin sic është ku të donë në Europë, të një teatri nacional kombëtar dhe ta vënë, por do të çedojë vetëm në pagesat e artistëve me standardet që kemi ne.

Në Europën Perëndimore të drejtat e njeriut janë primare, në fillim shikojnë artistin, njeriun.

Më pas kur i krijon kushte të favorshme për të punuar, artisti do shikojë vetëm punën, jo kush vjen drejtor e kush ikën. Ndaj, kushdo që vjen drejtor i ka ligjet e përcaktuara dhe atij do t’i referohet.

Nëse marrim një shembull, kam një shok në korin e Frankfurtit. Ai ka bërë kontratën e përhershme, i kanë caktuar datën kur merr pensionin dhe njeriun që do i japë lulet kur të dalë në pension, por edhe një njeri tjetër nëse ky që i jep lulet ndërron jetë. Ja ku ka arritur bota.

Kemi një jetë në teatër, po pi një grusht me ilaçe dhe s’u kujtuan të na respektojnë të paktën nga ana morale. Se rroga, me tre kosë 1 mijë lekë e kemi filluar, e ashtu po e mbarojmë. Se rroga ima aq është.

As parking s’na kanë lënë në teatër. Kur u takuam te Turbina me lali Erin dhe Edi Ramën, pasi ia shtruam këtë problem tha se do caktohet parkimi i TOB, për artistët dhe spektatorë. Deri tani asgjë nuk ka ndodhur. Le të më gjejë një teatër në botë pa parking dhe tërhiqem unë që nuk e paskemi kuptuar me qëllim.

Kompozitori Aleksandër Peçi: Ministria nuk i jep asnjë fond TOB

Edhe kompozitori Aleksandër Peçi thotë në një reagim për Politiko.al se Ministria nuk i ofron asnjë fond TOB.

Me mbështetje të plotë nga ministria e kulturës, por edhe për të shkruar opera e balete shqiptare premierë boterore. Ministria nuk i jep asnjë fond Teatrit të Operës dhe Baletit, për këtë që është thelbi i thelbit të zhvillimit të muzikës së modernizimit të kompozicionit”, tha Peçi, i cili më herët në një status në rrjetet sociale shkruante se kalimi i operës te një privat biletat do jenë mjaft të shtrenjta.

“Nëse TKOB supozojmë del privat, cili minister parlamentar qeveritar ne 20 premiera e shfaqje gjate 1 viti do presë një bilete 150 euro dhe ti japë nga xhepi tij operës 3000 euro çdo vit e per 20 vjet ai ti japë operës 60 000 euro?

Si mendoni psh ministrja e kultures do i japë 60 000 euro nga xhepi i saj per operen??

A do kete ndonjëherë një strategji si kjo p.sh e zhvillimit te madh ekonomik te vendit. Zhvillimi ekonomik eshte super zgjidhja edhe per operen, artin e stop emigrimit e gjithçka”.

Politiko.al/ S.Gj

Ditari politik

Të fundit