‘Boom-i’ i miliarderëve në botë, kush po fiton terren Evropa apo SHBA-të?

Numri i miliarderëve në nivel global po vazhdon të rritet me ritme të shpejta dhe nuk tregon shenja ngadalësimi, sipas një raporti të pasurisë të cituar nga Euronews Business dhe Knight Frank.

Sipas të dhënave, popullsia globale e miliarderëve është rritur nga 2,723 në vitin 2021 në 3,110 në vitin 2026, ndërsa pritet të arrijë në rreth 3,915 deri në vitin 2031.

Evropa në rritje të fortë

Evropa pritet të jetë një nga rajonet kryesore të kësaj rritjeje. Numri i miliarderëve në kontinent parashikohet të rritet nga 780 në 994 brenda pesë viteve, një rritje prej rreth 27%.

Sipas raportit, disa vende evropiane, veçanërisht ato nordike, pritet të kenë rritje të ndjeshme të numrit të super të pasurve, duke u renditur ndër më dinamiket në botë.

Ekspertët e pasurisë theksojnë se kjo rritje lidhet me “ndryshime strukturore në krijimin e pasurisë globale” dhe me qëndrueshmërinë e kapitalit privat pavarësisht pasigurive ekonomike.

Amerika rritet në numër, por bie në peshë globale

Edhe Amerika e Veriut pritet të shtojë miliarderë në terma absolutë, nga 995 në 1,089 deri në vitin 2031.

Megjithatë, sipas parashikimeve, pjesa e saj në totalin global do të bjerë nga 31% në 27.8%, duke qenë i vetmi rajon që shënon rënie në përqindje.

Ndërkohë, Azia-Paqësori mbetet rajoni me përqindjen më të lartë të miliarderëve në botë, duke përbërë rreth 36% të totalit global.

Trendet e pasurisë globale

Raporti nënvizon gjithashtu se kapitali privat po bëhet gjithnjë e më i lëvizshëm, ndërsa vendet ku miliarderët zgjedhin të investojnë apo të jetojnë po ngushtohen.

Sipas ekspertëve, kjo pasqyron një “përshpejtim strukturor të krijimit të pasurisë globale”, pavarësisht sfidave gjeopolitike dhe presioneve inflacioniste.