Masë ndaj liderit të opozitës dhe polici në selinë blu, pse mbrëmja e djeshme ishte "tërmet" për demokracinë

Mbrëmja e djeshme ishte e pazakontë për popullin shqiptar. Ndaj kreut të opozitës, Sali Berisha u vendos masë ndaluese, për një histori që ka nisur mbi 10 vjet më parë, e që lidhet me privatizimin e truallit të ish-klubit “Partizani”.

Ndërkohë dhëndri i Berishës, Jamarbër Malltezi  teksa priste në aeroportin ndërkombëtar 'Nënë Tereza' bashkëshorten e tij Argita tre oficerë të policisë pa uniformë, iu afruan dhe i vendosën prangat.

Për të sqaruar popullin shqiptar, Berisha lajmëroi konferencë për mediat në selinë blu në orën 21:00. 

Kreu i PD-së sqaroi se Jamarbër Malltezi nuk është thirrur kurrë nga asnjë prokuror apo asnjë gjykatës, duke shtuar se ishte Edi Rama që firmosi për ndryshimin e destinacionit për kompleksin “Partizani”, kurse procedura e privatizimit sipas tij nisi në kohën e Fatos Nanos.

“Jamarbër Malltezi nuk është thirrur në jetën e tij nga asnjë prokuror apo asnjë gjykatës për asnjë çështje. Prej tre vitesh, me padi të rreme të ngritura nga Taulant Balla, SKAP-i i partisë koa hetuar privatizimin e klubit Partizani. Pikërisht se nuk kanë gjetur dot asnjë shkelje të vetme, nuk kanë guxuar ta thërrasin kurrë në prokurori, por kanë preferuar të shpërndajnë lajme të rreme me gazetarë të keqpërdorur të oborrit qeveritar për gjoja abuzime.

Klubi i Partizanit nuk është nxjerrë nga plani i përhapjes i Forcave të Armatosura me propozimin e Sali Berishës dhe as me firmën e Bamir Topit, por nga presidentë të tjerë para Bamir Topit. Destinacioni i klubit Partizani, nga terren sportiv në truall për ndërtime, është ndryshuar me firmën e Edi Ramës dhe pa propozimin e Sali Berishës.

Është ndryshuar pra destinacioni i karakterit sportiv nga vetë Edi Rama. Me dokumente. Njohja dhe kthimi te pronarët e ligjshëm të pronarëve të klubit Partizani, janë gjashtë familje dhe 64 anëtarë, është bërë nga Komisioni i Kthimit të Pronave dhe gjykatat nga vitit 1994 deri në vitin 2006. Privatizimi i klubit Partizani është nisur nga qeveria e Fatos Nanos.

Ndërkohë në lidhje me masat e marra ndaj tij, Berisha u shpreh se SPAK-u ka kërkuar dhe më pas gjykata ka miratuar kërkesën për bllokimin e lëvizjes së tij jashtë vendit dhe masën detyrim paraqitje në kundërshtim me ligjin sepse është deputet dhe një masë e tillë mund të merrej vetëm nëse kalonte përmes parlamentit, pasi ka imunitet.

“Ai (Edi Rama) urdhëroi prokurorët e tij mercenarë, të denoncuar publikisht në këtë sallë, për fshehje dokumentesh, për manipulim dosjesh, për bashkëpunim me krimin dhe bandat, për të lëshuar urdhër në kundërshtim me Kushtetutën, nenin 73 të saj, i cili përcakton se liria e deputetit në çdo formë, lëvizje, nuk mund të cenohet pa miratimin e parlamentit.

Por, duke qenë autor i një propozimi të tillë në vitin 2012, që ky nen të hiqet, unë pranoj plotësisht sfidën. Pra, as kufizimi im për të lëvizur në Shqipëri, unë jam deputet dhe duhet të takohem me zgjedhësit, të cilët sot ndjehen më Sali berishë se kurrë. As kufizimi im për të lëvizur në Europë, nuk mund të ndodhte kurrë pa miratimin e komisioneve parlamentare. Por në vendin ku prokuroria është thjesht një seksion i PS, mund të merret çdo vendim” tha ai.

Teksa Berisha ishte në konferencë, rreth orës 22:45 dy efektivë të policisë së Tiranës ngjitur shkallët e selisë së PD-së duke iu drejtuar zyrës së Sali Berishës.

Dy efektivë, të krimit ekonomik dhe pastrimit të parave kanë kërkuar takim me Berishën. Por Berisha deklaroi se dy agjentët e policisë që i shkuan në seli për t’i komunikuar vendimin e gjykatës së Posaçme nuk i takoi duke argumentuar se po shkelet Kushtetuta.

“Deputetit nuk mund ti kufizohet liria pa autorizim të parlamentit. Në vitin 2012 unë kam çuar ligjin që të mos ekzistojnë asnjë nga këto (imuniteti), por kundërshtari më i egër i atij ligji ishte Rama.

Tani në panik të tmerrshëm, pasi e di që beteja është pa kthim, kishte dërguar oficerë të lartë dhe cfarë është e vërteta, jo nga prokuroria, por policia, që nuk mund të vinin kurrë, por të shndërruar në mercenarë.

Unë nuk i takova personalisht. Unë do të respektoj kushtetutën, ajo prevalon. Unë s’i takova fare. Po t’i takoja do u thosha  “çojani Ramës ta ziejë çaj” tha Berisha.