Zhdukja e Eglant Koçit, policia: Një strukturë e posaçme po merret me gjetjen e trupit

Drejtori i Policisë së Tiranës, Oligert Torba, gjatë një konference për mediat u ndal edhe te zhdukja e Eglant Koçit, i cili dyshohet se është ekzekutuar disa ditë më parë nga miku i tij.

Ai u shpreh se ky rast është duke u ndjekur nga Krimet e Rënda dhe se kërkimet janë fokusuar në rrethinat e Tiranës, në kufi me Elbasanin.

“Ndërsa për zhdukjen e Englant Koçit, ngjarje goxha sensitive, nga ana jonë është ngritur një grup i posaçëm hetimor. Indicia është marrë nga familjarët e të dyshuarit, të humburit. Hetimi po ndiqet nga Struktura e Krimeve të Rënda.

Është një strukturë e posaçme që po kërkon trupin e tij, kërkimet janë përqendruar kryesisht në rrethinat e Tiranës, mes kufirit ndarës të Elbasanit të Shtetit. Krahas forcave tona, na ka ardhur në ndihmë edhe nga FSK-ja. Vijon kërkimi, deri tani nuk kemi një rezultat konkret.

Janë kontrolluar shumë zona që kishim dyshimet tona, nuk kemi ndonjë rezultat”, tha drejtori i Policisë, Oliger Torba.

Armand Shakaj, i shpallur në kërkim si autor të dyshuar për zhdukjen e Eglant Koçit, dyshohet se ka përdorur një karrotrec për të transportuar automjetin e tij, brenda të cilit mendohet se ndodhej edhe trupi i 34-vjeçarit, drejt zonës së Ibës.

Sipas hetuesve, kjo manovër është kryer për t’iu shmangur kontrolleve rutinë të policisë dhe për të mos ngjallur dyshime gjatë lëvizjes së automjetit. Ngjarja dyshohet të ketë ndodhur më 6 qershor.

Nga verifikimet e kamerave të sigurisë rezulton se trupi i Koçit mund të jetë mbajtur në automjet për rreth një ditë e gjysmë, pasi kontaktet e fundit të tij me familjarët datojnë më 4 qershor.

Policia ka identifikuar dhe marrë në pyetje drejtuesin e karrotrecit. Sipas dëshmisë së tij, automjeti i Shakajt është transportuar pranë një servisi në zonën e Ibës, pasi ky i fundit i kishte thënë se makina kishte pësuar defekt. Dëshmitari ka deklaruar se pas dorëzimit të mjetit është larguar dhe nuk kishte asnjë dijeni se çfarë mund të ndodhej në brendësi të tij. Ndërkohë, në ambientet e zyrës ku dyshohet se është mbajtur Eglant Koçi, ekspertët kanë konstatuar gjurmë mbetjesh baruti.

Grupi hetimor është në pritje të rezultateve të ekspertizës laboratorike, e cila pritet të hedhë më shumë dritë mbi rrethanat e ngjarjes. Prej disa ditësh, policia po zhvillon kërkime intensive në dy drejtime kryesore, gjetjen e trupit të Eglant Koçit në zonat përreth Tiranës, Elbasanit dhe Librazhdit, si dhe lokalizimin e arrestimin e Armand Shakajt, i cili vijon të jetë në arrati.

Burime të sigurta bëjnë me dije se 41-vjeçari ka ndryshuar të paktën gjashtë numra telefoni gjatë ditëve të fundit, në një përpjekje të vazhdueshme për të shmangur lokalizimin nga strukturat ligjzbatuese.