Sali Berisha, politikani që u rikthye sa herë u konsiderua jashtë loje

Kur Departamenti Amerikan i Shtetit e shpalli Sali Berishën “non grata” në maj të vitit 2021, të shumtë ishin ata që e konsideruan si fundin e karrierës së tij politike.

Vendimi i Uashingtonit u pa si një goditje e rëndë për figurën e ish-kryeministrit dhe ish-presidentit tw vendit duke krijuar bindjen se ai do të mbetej i izoluar në skenën politike shqiptare.

Por, Berisha zgjodhi një rrugë tjetër.

Në vend të tërheqjes, ai nisi një betejë të gjatë politike dhe publike për të kundërshtuar akuzat, të cilat nuk i pranoi asnjrëherë, shkruan politiko.al. 

Pesë vitet që pasuan u shoqëruan me përplasje të forta brenda Partisë Demokratike, protesta, beteja gjyqësore dhe një përballje të vazhdueshme me kundërshtarët e tij politikë.

Pavarësisht parashikimeve për fundin e rolit të tij, Berisha arriti të rimarrë kontrollin e PD-së dhe të mbetet figura qendrore e opozitës shqiptare.

Viti 1997: Kriza që u duk sikur i dha fund karrierës

Pas kolapsit të firmave piramidale dhe trazirave të vitit 1997, Berisha u largua nga pushteti në një nga momentet më të vështira të historisë së Shqipërisë. Shumë besonin se karriera e tij politike kishte marrë fund dhe se ai nuk do të rikthehej më në drejtimin e vendit.

Megjithatë, vetëm pak vite më vonë ai riorganizoi Partinë Demokratike dhe në vitin 2005 u rikthye në pushtet si kryeministër.

Viti 2013: Nga dorëheqja te rikthimi në qendër të opozitës

Pas humbjes së zgjedhjeve parlamentare të vitit 2013, Berisha dha dorëheqjen nga drejtimi i Partisë Demokratike. Në atë kohë u fol shpesh për tërheqjen e tij përfundimtare nga politika aktive dhe kalimin në rolin e një figure historike të së djathtës, shkruan politiko.al. 

Por zhvillimet e mëvonshme treguan të kundërtën. Ai mbeti një zë i fortë në jetën politike dhe gradualisht rifitoi ndikim brenda opozitës.

Viti 2021: Shpallja “non grata” dhe përplasja me establishmentin

Shpallja “non grata” nga SHBA u konsiderua goditja më e fortë politike ndaj Berishës në dekada. Vendimi solli përçarje të thella brenda Partisë Demokratike dhe hapi një konflikt të ashpër me drejtimin e atëhershëm të partisë.

Në vend që të tërhiqej, Berisha nisi një lëvizje politike që kulmoi me rimarrjen e kontrollit të PD-së dhe rikthimin e tij në krye të opozitës.

Pesë vite përballje politike

Gjatë kësaj periudhe, ai u përball me izolim diplomatik, beteja gjyqësore, sulme politike dhe sfida të shumta brend vetë opozitës. Megjithatë, arriti të mbetet figura më e rëndësishme e kampit opozitar dhe të ruajë mbështetjen e një pjese të konsiderueshme të elektoratit.

Për mbështetësit e tij, çdo zhvillim që do të çonte në heqjen e statusit “non grata” do të përbënte kulmin e një beteje pesëvjeçare dhe një fitore personale, politike dhe morale.  

Por një gjë është e sigurt, në historinë e tranzicionit shqiptar, pak politikanë kanë njohur kaq shumë rënie dhe rikthime sa Sali Berisha./Politiko/