Partia Demokratike nxjerr ‘dosjen’ e 13 viteve të qeverisjes Rama

Zëdhënësja e Antikorrupsionit në PD, Genta Vangjeli, ka akuzuar qeverinë e Edi Ramës për një histori të gjatë aferash korruptive, koncesionesh klienteliste dhe skandalesh që sipas saj kanë dëmtuar financat publike dhe besimin e qytetarëve te shteti.

Ajo renditi një sërë çështjesh, nga marrëveshja me CEZ-in, dosjet 339 dhe 184, koncesionet në shëndetësi dhe inceneratorët, deri te skandali McGonigal, Porti i Durrësit dhe databaza e patronazhistëve.

Sipas Vangjelit, qeverisja e PS-së është shoqëruar nga korrupsion, pandëshkueshmëri dhe lidhje klienteliste, ndërsa hetimet për disa prej këtyre çështjeve vijojnë ende.

Në emër të Partisë Demokratike, ajo deklaroi se kryeministri Edi Rama ka humbur besimin publik dhe legjitimitetin moral për të drejtuar vendin, duke kërkuar dorëheqjen e tij.

DEKLARATA E PLOTE

Prej më shumë se një dekade, Shqipëria është zhytur në një seri të pandalshme skandalesh, aferash korruptive, koncesionesh klienteliste dhe akuzash të rënda që kanë shoqëruar qeverisjen e Edi Ramës.

Çdo vit i qeverisjes së tij është shënuar nga një dosje e re, një aferë e re, një skandal i ri që ka rënduar mbi xhepat e qytetarëve shqiptarë dhe ka minuar besimin tek shteti, drejtësia dhe demokracia.

Nga marrëveshja me CEZ-in, çështja e avionit të drogës në Divjakë, deri tek koncesionet famëkeqe të Check-Up-it, Sterilizimit, Laboratorëve dhe Hemodializës, shqiptarët kanë parë sesi miliarda lekë publike janë transferuar në duart e një grushti klientësh të pushtetit.

Nga dosjet 339 dhe 184, tek lidhjet e politikës me krimin e organizuar, nga skandali i ‘Unazës së Re’ tek shembja e Teatri Kombëtar, nga inceneratorët fantazmë tek databaza e patronazhistëve dhe rrjedhja masive e të dhënave personale të qytetarëve, çdo episod ka prodhuar më shumë korrupsion, më shumë pandëshkueshmëri dhe më shumë varfëri për shqiptarët.

Skandali ndërkombëtar McGonigal, çështja e Portit të Durrësit, investitorët strategjikë, kullat që mbijnë çdo ditë në Tiranë me kapitale të pajustifikuara, kontratat ‘1 euro’, marrëveshjet e errëta dhe tenderat me ofertues të vetëm kanë krijuar modelin më të pastër të kapjes së shtetit nga interesat klienteliste dhe oligarkike.

Edhe sot, dosja e inceneratorëve vazhdon të rëndojë mbi qeverinë, ndërsa hetime të reja për tendera infrastrukture dhe afera të tjera vazhdojnë të dalin në dritë.

Shqiptarët nuk mund të vazhdojnë të paguajnë faturën e korrupsionit, propagandës dhe abuzimit me pushtetin.

Përballë kësaj historie të gjatë skandalesh, dështimesh dhe aferash korruptive, një gjë është e qartë:

Edi Rama nuk ka më as legjitimitetin moral, as besimin publik për të qeverisur Shqipërinë.

Edi Rama, koha e jote ka përfunduar.

Dorëheqja është domosdoshmëri, dhe fati yt politik është i pashmangshëm.

Në vijim disa nga aferat që lidhen me qeverinë Rama përgjatë viteve 2013-2026.

2013-2014

• Marrëveshja me CEZ.

• Vjedhja e Thesarit të Bankës së Shqipërisë.

• Çështja e avionit të drogës në Divjakë.

• Lazarati dhe debati për kanabizimin e vendit.

• Emërimet masive politike në administratë.

• Debatet për legalizimet dhe pronat.

2015

• Koncesioni i Check-Up.

• Koncesioni i Sterilizimit.

• Koncesioni i Laboratorëve.

• Debatet për PPP-të e para në shëndetësi.

• Akuzat për zgjerimin e kultivimit të kanabisit.

2016

• Koncesioni i Hemodializës.

• PPP-të në infrastrukturë.

• Tendera me ofertues të vetëm.

• Debatet për financimet publike në sektorin e shëndetësisë.

2017

• Çështja e ish-ministrit Saimir Tahiri.

• Dosja Habilaj.

• Akuzat për blerje votash në zgjedhjet parlamentare.

• Debatet për lidhje të politikës me grupe kriminale.

2018

• Dosja 339.

• Dosja 184.

• Skandali i ‘Unazës së Re’.

• Falsifikimi i dokumenteve në tenderin e Unazës.

• Protestat studentore dhe fondet universitare.

• Kontrata e rrugës Milot–Balldren.

• Debatet për Teatrin Kombëtar.

2019

• Menaxhimi i fondeve të rindërtimit pas tërmetit.

• Tenderat e rindërtimit.

• Kontratat emergjente pas tërmetit.

• Eko Parku i Porto Romanos.

2020

• Shembja e Teatrit Kombëtar.

• Kontratat emergjente të COVID-19.

• Blerjet e pajisjeve gjatë pandemisë.

• Inceneratori i Elbasanit.

• Inceneratori i Fierit.

• Inceneratori i Tiranës.

• Pagesat publike për inceneratorë që nuk funksiononin sipas pritshmërive.

2021

• Databaza e patronazhistëve.

• Publikimi i të dhënave personale të qytetarëve.

• Rrjedhja e të dhënave të pagave.

• Arrestimi i Lefter Kokës në dosjen e inceneratorëve.

2022

• Skandali McGonigal.

• Sulmi kibernetik ndaj sistemeve shtetërore.

• Projekti i Portit të Durrësit.

• Çështja Becchetti / arbitrazhi ndërkombëtar.

• Air Albania dhe debatet mbi financimin e saj.

• Tuneli i Llogarasë dhe debatet mbi koston.

2023

• Arben Ahmetaj dhe akuzat për inceneratorët.

• Investitorët Strategjikë.

• Amnistia Fiskale.

• Kullat në Tiranë dhe burimi i kapitaleve.

• Kontratat ‘1 euro’.

2024

• Vijimi i hetimeve për inceneratorët.

• Marrëveshja Itali–Shqipëri për emigrantët.

• Debatet mbi legalizimin e kultivimit të kanabisit për qëllime mjekësore.

2025–2026

• Debatet për Sazanin dhe investimet strategjike.

• Porto Romano dhe porti i ri tregtar.

• Hetime të reja për tendera infrastrukture.

• Vijimi i dosjes McGonigal.

• Vijimi i dosjes së inceneratorëve.

• Debatet për Portin e Durrësit dhe kompanitë offshore.