Nis sot zyrtarisht, The Sun: Pse mund ky të jetë Botërori më i bukur në histori

Spektakli më i madh i futbollit në planet nis sot zyrtarisht.

Për herë të parë në histori, Botërori do të luhet me 48 skuadra. Ndeshjet do të zhvillohen në SHBA, Meksikë dhe Kanada. Shtetet e Bashkuara do të kenë 11 stadiume pritëse, Meksika 3 dhe Kanadaja 2. Sipas rregullit, vendet pritëse, janë të kualifikuara automatikisht. 

Nga stadiumi legjendar Azteca në Meksikë, nën një mot të paqëndrueshëm mes diellit dhe reshjeve, e deri te finalja që do të luhet muajin e ardhshëm pranë Nju Jorkut, miliona tifozë në mbarë globin do të jetojnë 39 ditë plot emocione, shpresa, zhgënjime dhe momente që do të mbeten përgjithmonë në kujtesë.

Prestigjiozja britanike, The Sun, në një artikull të saj ka shkruar se përse ky Botëror mund të jetë më i bukuri në histori.
Botërori 2026 do të jetë turneu më i madh që është organizuar ndonjëherë. Për herë të parë në histori do të marrin pjesë 48 kombëtare, ndërsa do të zhvillohen plot 104 ndeshje në 16 qytete të shpërndara në tre vende organizatore: Shtetet e Bashkuara të Amerikës, Kanada dhe Meksikë.

Kur këto tre vende fituan të drejtën e organizimit në vitin 2018, reagimi ishte entuziast. Megjithatë, ndërsa turneu afrohet, jo të gjithë tifozët janë të gatshëm të udhëtojnë. Kostot e larta të biletave, hoteleve, fluturimeve, restoranteve dhe transportit lokal kanë bërë që shumë prej tyre të heqin dorë nga aventura amerikano-veriore.

Pavarësisht kritikave dhe sfidave organizative, pritshmëritë mbeten të mëdha. Futbolli vazhdon të jetë forca që bashkon miliona njerëz dhe ky Botëror premton të ofrojë spektakël në çdo cep të kontinentit.

Nisja në stadiumin Azteca ka një simbolikë të veçantë. Pikërisht aty janë luajtur dy finale historike të Kupës së Botës: në vitin 1970, kur Brazili i udhëhequr nga Pelé mahniti botën, dhe në vitin 1986, kur Diego Maradona shkroi një nga kapitujt më të mëdhenj të futbollit.

Megjithatë, finalja e këtij edicioni nuk do të luhet në Meksikë. Në praktikë, ky konsiderohet një Botëror me qendër në SHBA, ndërsa Kanadaja dhe Meksika do të presin një numër më të kufizuar ndeshjesh.

Risia më e madhe mbetet zgjerimi në 48 skuadra. Formati i ri sjell më shumë ndeshje dhe më shumë mundësi për kombëtaret më të vogla, por gjithashtu ka ngritur pikëpyetje për kompleksitetin e garës. Megjithatë, fazat eliminatore do të jenë më të gjata dhe më dramatike, duke kërkuar që kampioni të kalojë pesë ndeshje direkte për të ngritur trofeun.

Një tjetër sfidë do të jenë distancat e mëdha mes qyteteve pritëse. Skuadrat do të duhet të përshkojnë mijëra kilometra, të kalojnë zona të ndryshme kohore dhe të përshtaten me kushte klimatike krejtësisht të ndryshme.

Ndërkohë, rregullat e reja kundër humbjes së kohës duket se po japin rezultat. Loja pritet të jetë më dinamike dhe topi do të qëndrojë më shumë në lojë, duke rritur intensitetin e ndeshjeve.

Ndërkohë, The Sun, një pjesë të madhe të vëmendjes së saj e ka përqendruar te Anglia. Kombëtarja angleze, tashmë e drejtuar nga Thomas Tuchel, hyn në turne me pritshmëri të larta pas suksesit të viteve të fundit nën drejtimin e Gareth Southgate. Objektivi është i qartë: fitimi i trofeut. Çdo rezultat tjetër do të konsiderohet zhgënjim për një skuadër që synon majën e futbollit botëror.

Megjithatë, rivalët janë të shumtë dhe të fortë. Franca, Gjermania, Spanja, Portugalia, Brazili dhe Argjentina mbeten pretendentët kryesorë për titullin.

Ky Botëror mund të shënojë gjithashtu paraqitjen e fundit në skenën më të madhe për dy ikonat e futbollit modern, Lionel Messi dhe Cristiano Ronaldo. Madje, ekziston mundësia që ata të përballen mes tyre në fazat finale të turneut, në atë që do të ishte një nga duelet më të shumëpritura në historinë e futbollit.

Nga ana tjetër, turneu do të mirëpresë edhe debutues të rinj si Jordania, Kepi i Gjelbër, Uzbekistani dhe Curaçao, duke sjellë histori të reja dhe ëndrra të mëdha.

Për më shumë se pesë javë, tifozët do të përjetojnë emocione të forta, ndeshje spektakolare, gola vendimtarë dhe momente dramatike. Kupa e Botës mbetet ngjarja që arrin të bashkojë globin si asnjë tjetër kompeticion sportiv.

Beteja për fronin e futbollit botëror sapo ka filluar.