Flash News

Burgu i Peqinit si Dubai, Artan Hoxha nxjerr videon: Qelia hotel me 7 yje

Antimitingu përballë protestës qytetare, Rama bën ‘naivin’: S’është provokim, nuk mund ta spostonim

SHBA heq kufizimin e hyrjes, Berisha: Ishte vendim i bazuar në lobimin korruptiv të Ramës dhe Soros

Operacioni i SPAK, zbardhen urdhër-arrestet e lëshuara; cilët janë personat e goditur?

SHBA hoqi “non gratën”, Berisha: Mirënjohje administratës Trump, u korrigjua një vendim i padrejtë

E-TJERA

Rama jep shtëpinë e Fëmijës “Zyber Hallulli” për t'u ndërtuar kulla 35 katëshe

Politiko 12 Qershor 2026, 15:40

Rama jep shtëpinë e Fëmijës “Zyber Hallulli”

Korporata e Investimeve Shqiptare (AIC) ka nënshkruar së fundmi pa shumë zhurmë kontratën për zhvillimin e projektit me kulla në truallin ku aktualisht ndodhet Shtëpia e Fëmijës “Zyber Hallulli” në Rrugën e Elbasanit në Tiranë.

Dokumenti i siguruar nga Ekofin.al tregon se më 4 qershor 2026 është lidhur kontrata me shoqërinë “Motus” shpk, e cila ishte shpallur fituese në janar të këtij viti në konkursin e organizuar nga AIC dhe Agjencia Kombëtare e Planifikimit të Territorit. Sipas kontratës, kompania ofron 46% të sipërfaqes së zhvillimit për Korporatën, ndërsa do të realizojë projektin multifunksional në truallin publik të “Zyber Hallullit”.

Pas kompanisë Motus qëndron sipërmarrësi Idajet Ismailaj, emri i të cilit lidhet me disa ndërtime të tjera kontroverse.  Ismailaj është po ashtu aksioner në Alb-Star, kompania e njohur për ndërtimin e stadiumit “Arena Kombëtare” dhe kullës shoqëruese, ndërsa një tjetër kompani, Finnman, sërish e lidhur me Ismailajn po ndërton resortin e Manastirit, ku zhvillimi intensiv i ndërtimit ka ngjallur debat publik për betonizimin e një prej zonave më të veçanta bregdetare.

Kontrata vjen rreth pesë muaj pasi juria e konkursit shpalli fitues projektin e studios meksikane Rojkind Arquitectos, e angazhuar nga Motus së bashku me bashkëpunëtorët Asab, Son Engineering & Construction dhe arkitektin Julian Kasharaj.

Konkursi i janarit për truallin e “Zyber Hallullit” prodhoi një rezultat të pazakontë. Pas rreth katër orësh diskutime, juria vendosi të ndajë fituesit në dy kategori, duke argumentuar se asnjë prej pesë projekteve finaliste nuk i përmbushte plotësisht të gjitha objektivat e kërkuara.

Grupi i udhëhequr nga Rojkind Arquitectos fitoi të drejtën për zhvillimin e pjesës komerciale dhe rezidenciale në truallin aktual të jetimores, ndërsa grupi i kryesuar nga Taller Hector Barroso fitoi projektimin e kampusit të ri të jetimores dhe godinave të inspektorateve që do të ndërtohen në zonën e ish-vilave gjermane.

Projekti fitues i Rojkind Arquitectos parashikon ndërtimin e tri kullave me lartësi 20, 25 dhe 35 kate, të lidhura mes tyre me ura dhe hapësira të përbashkëta. Dy prej kullave do të kenë funksion kryesisht rezidencial, ndërsa projekti parashikon edhe shfrytëzim intensiv të nëntokës për parkinge.

Thirrja e hapur nga AIC në shtator 2025 parashikonte që investitori privat të financonte ndërtimin e kampusit të ri të jetimores “Zyber Hallulli” dhe të godinave të inspektorateve shtetërore, ndërsa në këmbim do të merrte të drejtën për zhvillimin e truallit ekzistues në një kompleks kullash multifunksionale.

Në përfundim të procesit, fitues doli grupi i angazhuar nga Motus, ndërsa tashmë me nënshkrimin e kontratës projekti hyn në fazën e zbatimit. Kjo do të thotë se një tjetër truall publik në një nga zonat më të shtrenjta të Tiranës do t’i hapë rrugë një zhvillimi të ri me tre kulla, duke ndryshuar rrënjësisht fizionominë urbane të hyrjes së Rrugës së Elbasanit.

Nënshkrimi i kontratës është bërë pa njoftime publike apo prezantime të posaçme nga AIC, ndonëse bëhet fjalë për një projekt me ndikim të konsiderueshëm urban dhe ekonomik, që prek jo vetëm një institucion social me histori të gjatë si “Zyber Hallulli”, por edhe një nga parcelat më të lakmuara të tregut të pasurive të paluajtshme në kryeqytet. /Ekofin.al

Të fundit