PD denoncon: Emirjana Sako në prag fushate kërkon të blejë vota me fondet e tërmetit

Kryetari i Partisë Demokratike në Durrës, Dritan Burgija, denoncoi kryebashkiaken e qytetit Emiriana Sako për keqpërdorim të fondeve të tërmetit.

Burgija tha në një deklaratë për mediat se edhe pse kanë kaluar 4 vite nga tërmeti i 26 Nëntorit, një pjesë e qytetarëve të Durrësit, vijojnë të qëndrojnë në çadra.

Burgija deklaroi se në një situatë të tillë kur qytetarët nuk marrin përgjigje nga Bashkia dhe në prag të zgjedhjeve, Emirana Sako ka thirrur me urgjencë mblehdjen e Këshillit Bashkiak për fondet e tërmetit.

Deklarata e kreut të PD Durrës:

Kanë kaluar katër vjet nga tërmeti i nëntorit 2019 por qytetarët e Durrësit vazhdojnë të jetojnë në çadra apo jashtë shtëpive të tyre.

Është e qartë për këdo që Shqipëria tanimë nuk është në kushtet e gjendjes së fatkeqësisë natyrore të tërmetit por qytetarët e prekur nga kjo fatkeqësi ndodhen në gjendjen e fatkeqësisë së shkaktuar nga keqqeverisja dhe abuzimi me pushtetin dhe fondet publike.

Qytetarët durrsakë vazhdojnë të përplasen dyerve të bashkisë sepse u duhen përsëri për votimet e rradhës së kryebashkiakes.

Duke zvarritur procesin dhe fondet që i akordohen, kryebashkiakja e Durrësit pret zgjedhjet të miratoje grantet dhe listat e përfituesve duke zhvilluar mbledhje të Këshillit Bashkiak, të thirrura jashtë rradhe, në urgjencë, e duke shkelur Kodin Zgjedhor. Neni 91 paragrafi 4 ndalon shprehimisht ndarjen e fondeve publike në favor të zgjedhësve për një periudhe kohore prej 4 muaj para datës së zgjedhjeve.

Komisioni Shteteror i Zgjedhjeve e ka gjobitur dhe në zgjedhjet e kaluara Emirjana Sakon për shkelje te tilla.

Sigurisht qelë halli i Sakos është i madh dhe ndonëse është përsëritëse në shkelje, nuk ndalet të përdorë të njëjtat mënyra të cilat janë denoncuar nga PD, shoqëria civile dhe janë gdhendur në raportin e OSBE/ ODIHR.

Qytetarët durrsakë janë të lodhur dhe mezi presin t’u normalizohet jeta.

Ata nuk do falin asnjë minutë të abuzimit të pushtetit me fatkeqesinë e tyre.

Kopjet e vogla të qeverisë së korrupsionit dhe skandaleve në 14 Maj do marrin përgjigjen e merituar.