PD: Prej 2 vitesh “Tigrat” e Ballukut marrin çdo ditë 90 mijë €, ende nuk punojnë

Partia Demokratike e Vlorës ka denoncuar ditën e sotme abuzimin me dy anijet TEC në qytetin bregdetar, të cilët janë marrë prej dy vitesh me qira nga Korporata Elektroenergjetike Shqiptare për prodhimin e energjisë, por ende edhe sot ato nuk janë vënë akoma në punë.

Kryedemokrati i Vlorës Atird Hoxha deklaroi nga ambientet e Triportit se për dy anijet TEC, të quajtura “Tigër 1” dhe “Tigër 2” se qytetarët shqiptarë paguajnë prej dy vitesh nga 90 mijë euro në total çdo ditë dhe kostoja deri më tani ka shkuar rreth 73 milion euro sipas tij.

Partia Demokratike i konsideron këto dy anije TEC si një abuzim i rëndë, një marrëveshje e mbështjellë me mungesë transparence dhe dyshime të forta për korrupsion.

PD i drejton dy pyetje ministres belinda Balluku se për çfarë paguhen miliona dollarë nga buxheti i shtetit, për pajisje që nuk prodhojnë asnjë kilovat energji dhe se kush përfiton nga këto marrëveshje të errëta që rëndojnë mbi kurrizin e qytetarëve shqiptarë.

Demokratët i bëjnë thirrje Kontrollit të Lartë të Shtetit dhe Prokurorisë që të nisin hetimet dhe të ndalojnë këtë skandal, duke vënë përgjegjësit para drejtësisë.

Deklarata e kryetarit të PD Vlorë, Atird Hoxha:                                  

Të nderuar qytetarë!

Sot është dita botërore kundër korrupsionit dhe ne jemi këtu në ambientet e Triportit në Vlorë, për të denoncuar një abuzim flagrant me paratë publike, në një aferë të pastër korruptive.

Korporata Elektro-Energjetike e Shqipërisë, vijon të jetë një shembull i qartë i shpërdorimit të taksapagueseve shqiptarë, për interesa korruptive dhe klienteliste. Çdo ditë kjo kompani i paguan 60 mijë dollarë kompanisë Excelerate Energy për këta dy TEC-e që ndodhen pas shpinës tonë, të cilat kanë mbërritur në qytetin e Vlorës, më shumë se dy vite më parë, por që nuk janë vënë ende në punë.

Sikur kjo të mos mjaftonte, KESH paguan 30 mijë dollarë të tjera, kompanisë italiane Renco, po për këto dy TEC-e, pra janë në total 90 mijë dollarë çdo ditë, për një shumë totale të shpenzuar deri tani, rreth 73 mln euro.

Ky është një abuzim i rëndë, një marrëveshje e mbështjellë me mungesë transparence dhe dyshime të forta për korrupsion.

Për çfarë paguhen miliona dollarë nga buxheti i shtetit, për pajisje që nuk prodhojnë asnjë kilovat energji.

Kush përfiton nga këto marrëveshje të errëta që rëndojnë mbi kurrizin e qytetarëve shqiptarë.

Këto janë pyetje për të cilat Belinda Balluku, duhet të japë përgjigje menjëherë.

Jemi sot këtu për ti bërë thirrje prokurorisë dhe KLSH-së që të hetojnë menjëherë këtë aferë të qartë korruptive. Nuk mund të lejohet që buxheti i shtetit, të shërbejë për pasurimin e një grupi individësh në kurriz të interesit publike.

Ky skandal duhet të ndalet, përgjegjësit duhet të dalin para drejtësisë dhe fondet publike duhet të përdoren për të mirën e qytetarëve. Ne nuk do të heshtim, do të ndjekim këtë çështje deri në fund, duke kërkuar transparencë, përgjegjësi dhe natyrisht drejtësi.