Skandali me EncroChat dhe bëmat gjatë detyrës, Ardi Veliu jep dorëheqjen nga drejtimi i AMP-së

Ardi Veliu ka dhënë dorëheqjen nga posti si drejtues i AMP-së.

Mësohet se sot pas mbledhjes së mëngjesit Veliu i ka raportuar vartësve të tij se nuk do të jetë më drejtues i tyre.

Ende nuk dihen arsyet që kanë çuar Veliun në dhënien e dorëheqjes nga drejtimi i AMP, post të cilin e mbante prej gati një viti, por disa burime pohojnë se Veliu është shkarkuar nga detyra pas skandalit të përgjimeve të SKY dhe EncroChat.

Më herët Veliu ka qenë në postin e Drejtorit të Përgjithshëm të Policisë së Shtetit si dhe atë të zv.ministrit të Energjisë dhe Infrastrukturës.

Veliu është akuzuar disa herë nga opozita gjatë mandatit të tij në krye të policisë.

“Shoferi” i Escobarit të Ballkanit

Ardi Veliu do të mbahet mend për momentin ku u shfaq si “shofer” i Klement Balilit, i cilësuar si “Eskobari i Ballkanit”.

Ky i fundi u dorëzua, i akuzuar për trafik ndërkombëtar të lëndëve narkotike, u dorëzua në afërsi të Finiqit.

Ai u përshëndet me familjarët e tij dhe më pas u shoqërua në drejtim të Tiranës nga eskorta e Policisë së Shtetit ku i pranishëm ishte edhe drejtori Ardi Veliu.

Dhuna ndaj të miturit dhe poshtërimi i së ëmës

Veliu do të mbahet mend për skandalin ku gjatë një raportimi në komisionin e sigurisë, ai nxori videon e mamasë së një të mituri, pasi u dhunua nga policia.

Veliu u mundua ta justifikonte dhunën ndaj djalit duke thënë ndër të tjera se “shih nga ç’familje vjen ai” duke publikuar një video ku e ëma e tij shfaqet me pistoletë në dorë.

Vetëm pak minuta më vonë rezultoi se e ëma i kishte xhiruar ato pamje për bërjen e një filmi dhe nuk ishin reale.

Vrasja e Klodian Rashës

Efektivi Nevaldo Hajdaraj vrau me pistoletën e shërbimit të riun Klodian Rashën, vetëm se kishte shkelur orën policore.

Policia nxori disa versione për ngjarjen, ndërsa zemërata popullore u shpreh në rrugë, ku të rinj të shumtë dolën në rrugë, duke djegur kosha plehrash e sinjalistikë rrugore, e duke u përballur me policinë.

Ata kërkonin shkarkimin e Sandër Lleshajt dhe Ardi Veliut, por nga posti u largua vetëm Leshaj, ndërsa Veliu u “mbijetoi” protestave, duke reaguar kundrejt të rinjve me dhunë policore e gaz lotsjellës.

Përgjimet e Nraghetas dhe mishi i derrit

Dosja e përgjimeve të Anti-mafias italiane për klanin Ndragheta, e publikuar nga Ora News, përmbante edhe faqe me biseda ku flitet për edhe për korruptimin e Policisë së Tiranës në vitin 2017, kur në detyrë ishte Veliu.

Një bisedë e datës 9 gusht 2017, që zhvillohet mes Tommaso Brutos, të birit, Saverio dhe Ercole D’Alessandro, ata thonë se kanë korruptuar me ushqime, djathë e mish derri, numrin një policisë në Tiranë për t’i lejuar të punonin të qetë.

“Ai kishte folur me Shefin e Policisë së Tiranës dhe një tjetër zyrtar të lartë në ministri dhe një zëvendësministër, të cilëve u kishte dërguar ushqime falë sipërmarrësit të qumështit Dedoni, i cili kishte dërguar të gjithë atë furnizim gastronomik me korrier“, – thuhet në dosjen e antimafias.

Bisedat vijojnë me përmendjen nga ish-oficeri të ushqimeve dhe mishit të derrit të zi.