Europa shtrëngon masat për migracionin, Shqipëria pjesë e planit

Me rastin e Samitit të Komunitetit Politik Evropian (EPC) në Jerevan, liderët e Shqipërisë, Armenisë, Austrisë, Belgjikës, Bullgarisë, Kroacisë, Qipros, Çekisë, Danimarkës, Estonisë, Finlandës, Francës, Gjeorgjisë, Gjermanisë, Greqisë, Irlandës, Italisë, Letonisë, Maltës, Moldavisë, Malit të Zi, Holandës, Maqedonisë së Veriut, Norvegjisë, Polonisë, Portugalisë, Rumanisë, San Marinos, Serbisë, Sllovakisë, Suedisë, Zvicrës dhe Mbretërisë së Bashkuar rikonfirmuan angazhimin për të bashkëpunuar në luftën kundër migracionit të paligjshëm.

Në samitin e mëparshëm të EPC në Kopenhagë, liderët identifikuan disa drejtime kyçe në ndjekje të një qasjeje “të gjithë rrugës” për të trajtuar migracionin e paligjshëm. Ata theksuan nevojën për të ndërmarrë veprime kundër kontrabandistëve, për të siguruar që kuadret ligjore vendase dhe ndërkombëtare të jenë të forta, për të përshpejtuar kthimet e migrantëve, për të krijuar partneritete të reja, për të menaxhuar në mënyrë efektive migracionin në vendet e origjinës, si dhe për të luftuar instrumentalizimin e migracionit. Gjithashtu, ata ranë dakord për rëndësinë e mbështetjes reciproke në këto përpjekje.

Këtë vit, përballë zhvendosjeve të mëdha të popullsisë nga Sudani, Briri i Afrikës dhe Lindja e Mesme, këto prioritete mbeten po aq jetike. Duke u bazuar edhe në mësimet e nxjerra nga kriza e migracionit e vitit 2015, me synimin për të shmangur një situatë të ngjashme në të ardhmen, liderët ranë dakord për mënyrat më të mira të përgatitjes dhe koordinimit të përpjekjeve.

Ata theksuan rëndësinë e:

Mbikëqyrjes dhe monitorimit: sigurimi i shkëmbimit të informacionit të përditësuar për të mbështetur gatishmërinë dhe një reagim të koordinuar.

Ndihmës humanitare: identifikimi i ndërhyrjeve të synuara për të ndihmuar personat në nevojë dhe për të frenuar flukset që në burim.

Bashkëpunimit me organizatat ndërkombëtare: partneritet dhe mbështetje për agjenci kyçe si UNHCR, IOM dhe Këshilli i Evropës.

Sigurisë: ruajtja e fokusit te siguria, mbrojtja dhe integriteti i kufijve tokësorë dhe detarë.

Luftës kundër krimit të organizuar të migracionit: ndërmarrja e veprimeve kundër kontrabandistëve dhe trafikantëve të qenieve njerëzore, përfshirë zinxhirët e tyre të furnizimit dhe përdorimin e sanksioneve.

Qeverisjes: garantimi që kuadret ligjore vendase dhe ndërkombëtare të mos abuzohen dhe të përballojnë kërkesat aktuale, duke mundësuar ndihmën për ata që kanë nevojë.

Kthimeve: sigurimi i marrëveshjeve efektive për kthimin e migrantëve, për të frenuar lëvizjet nga vendet e origjinës dhe tranzitit dhe për të lehtësuar presionin e brendshëm.

Një përgjigjeje gjithëpërfshirëse: përdorimi i të gjitha instrumenteve politike dhe diplomatike për të koordinuar përpjekjet ndërkombëtare dhe për të mbrojtur integritetin e kufijve.

Në deklaratë theksohet se është bërë progres i rëndësishëm që nga viti i kaluar, përfshirë masa të reja, partneritete dhe goditje ndaj rrjeteve të kontrabandës në nivel kontinental.