Përplasja Bozdo-Ibrahimaj në Kuvend/ “Shqiptarët po varfërohen”, ministrja: Kemi shmangur panikun

Debat mes deputetit demokrat Eno Bozdo dhe ministres së Financave dhe Ekonomisë, Delina Ibrahimaj, në lidhje me menaxhimin e krizës së rritjes së çmimeve në Kuvend.

Bozdo akuzoi qeverinë për pasivitet total, ndërsa Ibrahimaj mbrojti qasjen e matur të ekzekutivit për të shmangur panikun dhe ruajtur stabilitetin ekonomik.

Deputeti Eno Bozdo nisi interpelancën duke theksuar se qeveria nuk ka marrë asnjë masë konkrete për të lehtësuar barrën mbi qytetarët, veçanërisht shtresat në nevojë, përballë rritjes drastike të çmimeve të karburantit, plehrave kimikë dhe ushqimeve bazë.

"Shqiptarët janë ndoshta populli më i varfër në Europë, çka e bën çdo rritje çmimi më të ndjeshme," deklaroi Bozdo.

Ai vuri në dukje se ndryshe nga Shqipëria, vende si Gjermania dhe Italia kanë ndërhyrë me paketa financiare miliardëshe, duke ulur taksat dhe duke ofruar ndihmë direkte për familjet.

Duke paraqitur shifra alarmante, Bozdo pohoi se 45% e familjeve shqiptare me fëmijë jetojnë në rrezik varfërie ose përjashtimi social.

"Kjo do të thotë se gati gjysma e fëmijëve në këtë vend rriten pa siguri ekonomike dhe ushqim të mjaftueshëm," tha ai, duke shtuar se ndërsa çmimet në Shqipëri kanë arritur 64% të nivelit të BE-së, të ardhurat mbeten vetëm në 21%.

Në përgjigjen e saj, ministrja Delina Ibrahimaj argumentoi se qeveria ka vepruar me maturi dhe përgjegjësi. Prioriteti kryesor pas shpërthimit të krizës ndërkombëtare, sipas saj, ishte garantimi i zinxhirit të furnizimit me karburant për të parandaluar mungesat në treg.

"Kemi shmangur panikun, spekulimet dhe premtimet e pamatura që dëmtojnë buxhetin," tha Ibrahimaj. Ajo shtoi se janë ngritur grupe monitorimi dhe është aktivizuar Bordi i Transparencës për të mbikëqyrur çmimet dhe për të parandaluar abuzimet.

Ministrja mbrojti gjithashtu strukturën aktuale të taksave mbi karburantin, ku taksat përbëjnë 51.6% të çmimit final. Ajo e justifikoi taksën e qarkullimit si të drejtë, pasi lidhet me konsumin. "Paguam më shumë ai që konsumon më shumë. Një taksë fikse do të ishte më e padrejtë, pasi do të rëndonte njësoj si të pasurit, ashtu edhe të varfërit," shpjegoi ajo.

Ibrahimaj siguroi se inflacioni mbetet i moderuar dhe se qeveria është e gatshme të ndërhyjë me masa të reja sociale nëse situata përkeqësohet, por këmbënguli se "në rastet kur tregu funksionon, ndërhyrjet janë të panevojshme".

Debati u mbyll pa një konsensus, duke pasqyruar ndasitë e thella politike mbi strategjitë ekonomike. Nga njëra anë, opozita kërkon ndërhyrje të menjëhershme shtetërore për të mbrojtur qytetarët, ndërsa qeveria mbron një qasje të kujdesshme për të ruajtur ekuilibrat makroekonomikë, duke lënë të hapur pyetjen se çfarë masash, nëse do të ketë, do të merren në të ardhmen.