Policia dhe agjentët e BKH “blindojnë” Elbasanin, aksion për kapjen e Suel Çelës

Forca të shumta policie , kanë zbarkuar mëngjesin e kësaj të marte në Elbasan, ku po kryejnë kontrolle për kapjen e Suel Çelës, i shpallur në kërkim për porosi vrasjeje.

Forca e policisë kanë zbarkuar në tregun agroushqimor dhe në shtëpinë e Çelës për kontrolle.

Sipas SPAK, Çela ka porositur vrasjen e biznesmenit Lulzim Masha pranë liqenit artificial.

 Gjithashtu, SPAK dyshon se ai ka porositur edhe vrasjen e Elton Kilës.

Kush është Suel Çela, bosi i krimit në Elbasan

Telashet me drejtësinë të Suel Çelës datojnë që në 2006-n, por në të gjitha rastet deri më tani ai ja ka dalë mbanë që t’i shmanget qelisë për një kohë të gjatë. Krimi i parë për të cilin u akuzua ishte vrasja me armë zjarri në Roland Mustës në Elbasan.

Çela, në atë kohë 20 vjeç dhe me banim në të njëjtën lagje u arrestua si i dyshuaar në Shkodër. Ndaj tij u ngritën akuzat e vrasjes me paramendim dhe prodhim e mbajtje pa leje e armëve luftarake.

Në vendngjarje, policia gjeti 3 gëzhoja të dala nga një armë zjarri. Në të njëjtën kohë policia bllokoi edhe kartat e telefonit dhe mori dëshmi nga banorë të pallatit dhe lagjes ku ndodhi ngjarja.

Por, në fund të shqyrtimit të dosjes deklaroi pavlefshmërinë e procesverbalit të sekuestrimit të provave materiale, pavlefshmërinë e këqyrjes së një karte telefonike, pavlefshmërinë e procesverbaleve të dokumentimit të përgjimeve, pavërtetësinë e deklarimeve të prindërve të viktimës dhe të dëshmitarëve të tjerë.

Pas kësaj, Suel Çela u lirua në sallën e gjyqit, vendim i cili është kundërshtuar ashpër nga familjarët e viktimës.

Letra e fisit Çapja për Saimir Tahirin në 2016

Në nëntor të 2016, në zyrën e Saimir Tahirit ka mbërritur një letër nga fisi Çapja që i shpjegonte të gjithë lidhjen e Qazim Sejdinit me një grup të fuqishëm kriminal në trafikun e drogës dhe që vihej nën akuzë për disa vrasje.

Anëtarët e tij i kërkonin të hetonte këtë grup kriminal si përgjegjës për masakrën e fillim-shkurtit 2016 me 3 të vrarë e 8 të plagosur nga fisi i tyre. “Ky grup – shkruhet në letër – ka lidhje familjare me Qazim Sejdinin dhe gëzon mbështetje dhe mbrojtje të fortë politike prej tij”.

Fisi, autor i kësaj letre ishte pjesë e një spiralje hakmarrjesh, që në më shumë se një dekadë ka shkaktuar 11 viktima në përplasjen me fisin Mema. Përmendja e Qazim Sejdinit e bënte politikanin lokal potencialisht shenjestër të tij.

Saimir Tahiri i kërkoi pa vonesë Drejtorit të Përgjithshëm të Policisë, Haki Çakos, që të garantonte sigurinë e Sejdinit. Një eksortë u vendos menjëherë në mbrojtje të “Lalës së Elbasanit”.

Sapo vunë në dijeni Saimir Tahirin për dyshimet që kishin ndaj grupit që drejtohej nga Suel Çela dhe Sokol Sanxhaktari, dhëndri i Qazim Sejdinit, një grup i policisë kriminale u dërgua për t’i mbajtur nën vëzhgim Çapjat. Në letrën drejtuar Saimir Tahirit, fisi Çapja e njoftonte se nën presionin e Qazim Sejdinit, policia mund të ishte e kompromentuar.

Në lojë edhe politika

Në Elbasan prej vitesh operojnë në rivalitet të egër mes tyre dy 2 grupe kryesore: fisi Çapja dhe fisi Çela.

“Grupet kriminale në Shqipëri përherë identifikohen gjithmonë si mbështetës të një krahu politik në Elbasan. Kemi lexuar të njëjtën gjë, njëri grup Çapjat që mbështet të djathtën dhe njëri grup Çelajt me të majtën, nuk është e parealizueshme”, thotë gazetari Ferdinand Dervishi.

Vitet e fundit është vënë re fuqizimi i familjes Çela përkundrejt Çapjave që sot vuajnë edhe përballjen me ligjin. Ardian Çapja është arrestuar në gjyq për akuzën e organizimit të vrasjes me pagesë të Gentian e Nezir Beqirit në vitin 2012. Ndërkohë, edhe nipi i tij Florenc Çapja u arrestua në Dubai për të njëjtën akuzë. Ndaj Çapjave është hapur një tjetër dosje e vjetër për akuzën e vrasjes.

Me Çapjat e dobësuar dhe të ndodhur nën goditjen e vazhdueshme të autoriteteve ligjzbatuese, grupi i Çelajve, i udhëhequr nga Suel Çela kishin dorë të lirë në Elbasan.